Simulasaun atividade peska. Foto: Rafy Belo

DILI, (TATOLI)-Ministru Agrikultura no Peskas (MAP), liuhusi Diresaun Jerál Peska (DJP) ho nia parseiru sira hanesan WorldFish, Noruega no Banku Dezenvolvimentu Aziátiku (BDA) halo konsultasaun ikus ho peskadór sira hodi ko’alia kona-ba planu estratéjiku peska nasionál, iha forum peska nasionál, ne’ebé hala’o ohin, iha otel The Ramelau, Ai-mutin-Díli.

Estratéjia peska nasionál iha objetivu atu trasa dalan ba dezenvolvimentu iha setór peska ne’ebé sei fornese benefísiu nutrisaun, buka moris no ekonómiku másimu ba nasaun ne’e enkuantu asegura hela peska sustentável no ambiente tasi laran saudável.

“Iha fevereiru tinan kotuk hala’o tiha ona ho konsultasaun ba iha peskadór sira tomak iha Timor laran tomak, husu sira-nia hanoin, vizaun, kona-ba halo nusa mak ita hala’o serbisu peska nian iha Timor-Leste,” informa MAP, Joaquim dos Reis Gusmão ba jornalista sira.

Ministru ne’e informa mós katak atu kombate peska ilegál iha TL la’ós MAP mesak maibé serbisu hamutuk mós ho Ministériu Defeza (MD) inkluzivamente Polísia Nasionál Timor-Leste (PNTL) nomós Falintil-FDTL (Forsa Defeza Timor-Leste).

“Ami sei serbisu hamutuk ho para kombate peska ilegál. Tanba Ministru Agrikultura no Peska bele haree ró maibé detensaun labele. Detensaun tenke husu fali ba sira forsa,” akresenta governante ne’e.

Ministru Joaquim dos Reis Gusmão informa katak MAP ho apoiu parseiru sira hanesan WorldFish, Embaixada Noruega no BDA mak formula planu estratéjiku peska ne’e.

“Sira fó apoiu ba ita atu formula estratéjia ida ne’e. Diresaun Jerál Peska nian hamutuk ho parseiru sira konvoka reuniaun ho ita-nia peskadór sira para oinsa mak bele estabelese ita-nia polítika estratéjia peska nasionál ne’e,” informa ministru ne’e.

Governante ne’e mós informa, polítika no estratéjia MAP nian ba oin relasiona ho peska nian mak atu asegura peska iha tasi laran mezmu iha dezafiu.

“Ita iha dezafiu boot ida atu kontrola peska iha tasi laran. Ita komesa ho ita-nia estratéjia nasionál ne’e, atu bele regula hanusa mak ita bele serbisu di’ak liutan iha área peska nian. La’ós de’it ba iha peska iha tasi laran maibé mós ba ita-nia akuakultura-haki’ak ikan iha rai maran,” akresenta ministru Joaquim dos Reis Gusmão.

Ministru Joaquim dos Reis Gusmão rekoñese katak Timor-Leste no mundu agora hasoru dezafiu boot tolu ne’ebé mak afeta ba ita-nia tasi hanesan; lixu ba iha tasi laran, peska ne’ebé la sustentável nomós biodiversidade ne’ebé afetadu.

“Tanba ida ne’e mak Ministériu Agrikultura hamutuk ho Sekretáriu Estadu Meiu Ambiente nian serbisu hamutuk atu haree problema ida ne’e. Tanba ida ne’e la’ós problema nasionál maibé problema globál; mundu tomak nia fokus agora ba iha tasi tanba mundu tomak hanoin katak to’o 2050 ita-nia tasi sei nakonu ho lixu,” nia hateten.

Iha fatin hanesan, embaixadór Noruega ba Indonézia no Timor-Leste, Veegar Kaale hateten, Noruega apoiu ba MAP atu tau-matan liubá tasi nomós peska ninian, tanba situasaun idéntika akontese mós iha Noruega.

“Basá, hahan tasi hanesan indústria potensiál ida, ne’ebé bele tulun mós timoroan ka Timor-Leste atu nune’e objetivu prinsipál hodi promove nutrisaun di’ak no moris sustentável ba hirak ne’ebé mak depende ba iha rekursu ida ne’e,” dehan embaixadór Veegar Kaale.

Entretantu, forum peska nasionál ba konsultasaun planu estratéjiku nasionál ne’e, hahú loron rua, komesa horseik no remata ohin. Forum ne’e nu’udar faze ikus liu iha prosesu konsultasaun ba dezenvolvimentu estratéjia peska nasionál no revizaun ba lei peska ninian.

Prosesu konsultasaun tomak envolve reuniaun lokál no rejionál, maizmenus peskadór mane no feto na’in 800 no reprezentantivu husi ajénsia governu no naun-governu 30.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here