Embaixadora foun Malázia ba Timor-Leste, Sarimah Akbar, hato’o karta kredensiál ba Prezidente Repúblika, Franciso Guterres Lú Olo. Imajen Mídia PR

DILI, (TATOLI) – Embaixadora foun Malázia ba Timor-Leste, Sarimah Akbar,  hato’o karta kredensiál ba Prezidente Repúblika, Francisco Guterres Lú Olo, hodi hala’o misaun diplomásia iha Timor-Leste troka embaixadora tuan, Chitra Devi Ramiah.

Hafoin entrega kredensiál, Sekretáriu Ministériu Negósiu Estranjeiru no Kooperasaun TL (MNEK), Antonito de Araújo, ne’ebé akompaña ambaixadora foun ne’e hateten TL halo kooperasaun di’ak ho Malázia iha área tolu maka hasa’e kapasidade (capacity building), saúde, defeza no seguransa.

“Embaixadora rasik hato’o Malázia nia kompromisu atu kontinua relasaun di’ak ho Timor-Leste no eleva tan ba oin”, Antonito ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin akompaña embaixadora foun aprezenta karta kredensiál.

Nia hatutan embaixadora ne’e mós hato’o ba Prezidente Repúblika kona-ba Malázia nia kompromisu apoiu TL nia adezaun ba Asosiasaun Nasaun sira iha Sudeste Áziatika (ASEAN-sigla inglés) no espera katak ho Malázia nia apoiu TL bele lalais sai membru ASEAN.

Antonito haktuir Prezidente Repúblika agradese apoiu Malázia nian ba TL sai membru ASEAN no Prezidente hein katak ho aprezentasaun kredensiál hosi embaixadora foun ne’e, kooperasaun bilaterál entre nasaun rua ne’e ba oin nafatin, boot no metin liu-tan.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here