Votasaun finál globál proposta lei Orsamentu Jerál Estadu (OJE) 2018 iha uma fukun Parlamentu Nasionál. Imajen António Goncalves

DILI (TATOLI)— Vise-Prezidente Bankada Fretilín, Deputadu Francisco Miranda Branco, deskonfia iha tentativa hosi meza parlamentu nian, atu labele harii komisaun inkéritu Parlamentár hodi investiga Projetu governu nian antes atu halo pagamentu.

“Bankada Fretilín preokupa tebes tanba  sá até agora, meza seidauk halo ninia knaar loloos atu asegura estabelesimentu ba komisaun parlamentár. Tanba ne’e ami hakarak alerta ba públiku konaba tentativa ida ne’e,” Deputadu Francisco Miranda Branco esplika liuhosi nota komunikadu ne’ebé divulga foin lais ne’e.

Hatán ba kestaun ne’e, Prezidente Parlamentu Nasionál (PPN), Arão Noé,  klarifika, dokumentu rekerimentu husi bankada proponent sira la-kompletu.

“Ha’u hanoin la los ida bainhira dehan meza atu halo impedimentu, tanba  dokumentu rekerimentu tama ba meza la-kompletu, no husi nota téknika konfirma katak la-kompletu, entaun tenke husu fali bankada proponent para kompleta fali dokumentu sira”, Arão Noé defende.

Nia esplika, reuniaun semana kotuk fiksa ona membru ba komisaun ne’e no koloka tuir proporsionál idade,  Fretilín 4, CNRT, 3, PLP 2, KHUNTO 1 no PD 1, nune’e total membru hamutuk na’in 11, maibé naran sira ne’e seidauk hatama hotu mai iha meza PN nian, tanba ne’e la loos enkuantu Deputadu Branco akuza katak Meza PN halo tentativa hamate komisaun inkéritu

Komisaun inkéritu ne’e harii tanba bankada Fretilín mak submete proposta, tuir Fretilín prosesu halo adjudikasaun ba projetu 142 ho valór millaun $345 ba kompañia lubuk ida, la tuir prosedimentu legál aprovizionamentu, no akizisaun beins no servisu.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here