Primeiru-Ministru, Taur Matan Ruak, prezide reuniaun ba membru konsellu interministeriál Reforma Fiskál, hodi rona progresu servisu husi Komisaun Reforma Lejislativa iha salaun Sosiedade Sivíl Palásiu Governu, segunda ne’e. Imajen Mídia GPM

DILI, (TATOLI) – Primeiru-Ministru (PM), Taur Matan Ruak, prezide reuniaun ba membru konsellu interministeriál Reforma Fiskál hodi rona progresu servisu ne’ebé aprezenta husi Koordenadora Komisaun Reforma Fiskál (KRF), Fernanda Borges.

Ministru ne’ebé tama membru konsellu interministeriál Reforma Fiskál mak, Ministru Estadu Prezidensia Konsellu Ministru, Ministra Finansa em ezersísiu, Ministru Reforma Lejislativa no Asuntu Parlamentár, Ministru Justisa, Ministra no Vise-Ministra Solidaridade Sosiál no Inkluzaun, Ministru Obras Públikas, Ministru Transporte no Komunikasaun, Ministru Ensinu Superior, Siênsia no Kultura, Ministra Kuidadu Saúde Primáriu, no Ministru Agrikultura no Peska.

Ministra Finansa em ezersísiu, Sara Lobo Brites, haktuir reuniaun ne’e laiha desizaun maibé bazikamente koordenadora aprejenta ba PM no ministru sira kona-ba progresu no servisu sira ne’ebé mak reforma fiskál hala’o ona no autoridade sira ne’ebé mak sei implementa.

“Gradualmente reforma sira ne’ebé mak sei halo iha Autoridade Aduaneira no Autoridade Tributária bele iha progresu. Tanba uluk sira nain rua hanesan diresaun jerál maibé agora transforma ba autoridade, estatutu iha ona maibé prosesu seluk seidauk hanesan rekrutamentu, formasaun no servisu seluk tan”, tenik ba jornalista sira hafoin reuniaun ne’e remata iha Palásiu Governu, segunda ne’e.

Governante ne’e informa Diresaun Jerál Alfándega no Diresaun Jerál Impostu agora eleva ba Autoridade Aduaneira no Autoridade Tributária, mesmu estatutu ba autoridade rua ne’e aprova ona iha 2017, maibé prosesu seluk tenke la’o atu bele konklui.

“Objetivu atu bele hasa’e tan reseita doméstika, entaun la’ós de’it rekrutamentu maibé mós tenke hadi’a sistema ba autoridade rua ne’e, formasaun nomós kria kondisaun ba funsionáriu sira ne’ebé mak servisu iha alfándega no impostu”, dehan.

Nune’e nia akresenta tan enkontru hanesan sei kontinua, tanba servisu ne’e iha interligasaun hanesan ezemplu iha alfándega, karantina, transporte, no seluk tan, tanba ne’e konvida ministru sira para bele servisu hamutuk.

Antes ne’e, Autoridade Aduaneira no Autoridade Tributária legalmente tama iha vigor no hahú halo nia funsaun iha loron 30 setembru 2017 no 1 outubru 2017 respetivamente, hodi haforsa implementasaun Reforma Fiskál.

Autoridade foun rua ne’e rasik estabelese hodi troka Diresaun Jerál Alfándega no Diresaun Jerál Impostu.

Sita husi pájina ofisiál Ministériu Finansa, implementasaun autoridade rua ne’e marka tan pasu importante ida iha programa Reforma Fiskál hodi moderniza, harii integridade, transparénsia no profisionalizmu iha administrasaun Aduaneira no Tributária.

Autoridade rua ne’e nia estrutura organizasaun sei apoia rekrutamentu no treinamentu ba funsionáriu tékniku foun hodi implementa lei no prosedimentu foun no introdús sistema informasaun hodi automiza no simplifika prosesu servisu.

Mudansa ne’e sei progresivamente servisu hamutuk hodi rekolla reseita ho efisiente, fasilita komérsiu no redús kustu ba halo negósiu.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here