Imajen Google.

DILI, (TATOLI) – Membru husi rede Hadomi Agrikultura Sustantavel Timor Lorosa’e (HASATIL) hanesan Matadalan Institute (MDI), Permatil, Kadalak Sulimutu Institute (KSI), HAK, Serikat Petani Indonesia (SPI) ohin, lansa Tranzisaun Agroekolojia ba Soberania Alimentár (TAPSA-sigla iha portugés).

Koordenadora Rejionál ba Programa TAPSA, Herminia Soares Pinto, hatete pograma ne’e hetan apoiu husi organizasaun sosiedade sivíl ne’ebé eziste iha Fransa ne’ebé nia objetivu hakotu hamlaha iha mundu tomak inklui hola papél iha dezenvolvimentu.

“Programa ne’e rasik hahú implementa iha jullu tinan ne’e durante tinan haat. Ita koko serbisu hamutuk ho organizasaun sira ne’ebé eziste nanis ona, ne’ebé implementa ona sira-nia atividade iha área rurál sira hanesan KSI, Permatil, HAK ho MDI, inklui mós organizasaun ida husi Indonézia, SPI, mak orsida sei fó asisténsia ba Mokatil hanesan movimentu to’os-na’in ki’ik sira ne’ebé eziste iha Timór”, Herminia afirma iha ámbitu selebrasaun loron mundiál ai-han iha Faról ohin, ho tema promove ai-han lokál nutritivu hodi hakotu hamlaha no má nutrisaun iha tinan 2030.

Koordenadora ne’e haktuir montante orsamentu ba programa ne’e iha euro tokon-ida-rihun-atus-ida-sanulu-resin-rua (€1.112) ne’ebé sei uza durante tinan haat nia laran.

Nia hatutan benefisiáriu diretu ba programa ne’e maka agrikultór sira iha territoriu Timor-Leste laran hamutuk rihun 32.

Lansamentu ba programa ne’e halo iha komemorasaun loron mundiál ai-han (monu iha 16/10)  nian, tanba programa ne’e parte ba apoiu oinsá atu hasa’e produsaun ai-han hodi fanu sosiedade sivíl no to’os-na’in sira atubele hanoin ba futuru.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here