Logo HASATIL.

DILI, (TATOLI) – Organizasaun Hadomi Agrikultura Sustantavel Timor-Lorosa’e (HASATIL) husu ba Governu Konstitusionál Daualuk atu prioritiza no hasa’e orsamentu Estadu ba setór agrikultura no peska nian.

Porta vós HASATIL, Mariano Pereira, hatete rekomedasaun ida ne’e liuliu iha programa importante sira mak kapasitasaun, formasaun ba agrikultór no peskadór eskalaun ki’ik sira atu hasa’e produsaun no jestaun tuir dalan ne’ebé sustentavel.

“Fó atensaun didi’ak ba diversifikasaun produsaun ai-han iha rai-laran atu ladepende maka’as ba konsome produtu ida ka rua de’it hanesan foos no batar”, katak Mariano ba jornalista sira iha Faról ohin, ámbitu selebrasaun loron ai-han mundiál nian (ne’ebé monu iha 16/10) ho tema promove ai-han lokál nutritivu hodi hakotu hamlaha no má nutrisaun iha 2030.

Nia hatutan tan: “Fasilita ekipamentu prosesamentu no kapasitasaun ba grupu prosesamentu produtu agríkola sira ne’ebé maka eziste ona iha rai-laran atu hadi’ak liután sira-nia kualidade produtu, jestaun no asesu ba merkadu”.

Aleinde programa nesesáriu seluk maka promove agrikultura familiár, diversifika ai-han no ekonomia nu’udar fonte altenativa hodi substitui fundu Mina-rai.

Organizasaun ne’e mós rekomenda Governu atu fó prioridade promove ortikultura, haki’ak animál no ikan iha nivel umakain hodi prodús produtu ne’ebé saudavel no nutrisaun di’ak ba família atu hamenus má nutrisaun no ajuda ekonomia família nian.

“Husu ba organizasaun internasionál sira atu labele sai implementadór ba programa Food Aid ne’ebé sei estraga agrikultura lokál no hafraku Timor-Leste nia reziliénsia seguransa ai-han ba tempu naruk. Husu ba Ministériu Edukasaun, Agrikultura no Saúde atu labele simu implementasaun programa Food Aid iha Timor-Leste”, Mariano dehan.

Nune’e mós fó hanoin ba ezekutivu sira atu konstroe irrigasaun eskala ki’ik iha nivel aldeia no suku hodi fornese bee ba atividade produsaun iha nivel umakain no presiza estabelese sistema kolleta bee no konservasaun bee iha área sira ne’ebé menus bee.

“Promove diversifikasaun ai-han no konsensializasaun hodi muda kultura han nu’udar dalan ida hodi hamenus importasaun iha Timor-Leste”.

Iha parte seluk husu mós atu tau matan no halo avaliasaun krítika ba projetu ajénsia internasionál sira iha Timor-Leste atu labele hamosu problema tempu naruk ba Timor-Leste bainhira sira-nia projetu remata.

“Hametin igualdade entre mane no feto iha asesu ba fasilidade, rekursu no oportunidade ba kapasitasaun nomós maximiza partisipasaun no kontribuisaun feto sira-nia iha etapa produsaun tomak no promove agro-ekolojia, uza rekursu lokál atu hasa’e produsaun liuhusi dalan ne’ebé la estraga meiu ambiente”.

Iha okaziaun ida ne’e HASATIL mós bolu Governu, Parlamentu Nasionál, Prezidente Repúblika no públiku nia atensaun ba situasaun reál iha país ne’e liga ba produsaun ai-han rai-laran no dependénsia ba importasaun husi li’ur.

“Timor-Leste nia situasaun produsaun ai-han sei nafatin laiha progresu boot hafoin tinan 15 maski Governu Timor-Leste no ajénsia dezenvolvimentu sira gasta ona osan barak ba setór ne’e. Dadus estatístika agrikultura nian (http://maf.gov.tl/tl/dokumentu/send/2-anunsiu/44-buletin-seguransa-ai-han) husi Governu hatudu produsaun agrikultura kontinua tun. Ita-nia merkadu sira nafatin domina husi ai-han importadu no má nutrisaun kontinua sai problema boot)”.

Mariano salienta produsaun foos kontinua tun maski durante ne’e Governu tau atensaun boot liu ba parte ne’e liuhusi investimentu maka’as ba iha irrigasaun eskala boot hodi fornese bee ba natar sira nomós distribui tratór 4000 resin ba agrikultór sira.

“Polítika orsamentál Governu Timor-Leste nian labuka atu responde ba situasaun difisil iha setór agrikultura. Investimentu Estadu nian ba setór agrikultura tun ba beibeik. Ida ne’e refleta iha alokasaun Orsamentu Jerál Estadu ba setór agrikultura no peska dezde 2015 to’o 2018. Iha tinan 2015 aloksaun orsamentu ba setór agrikultura mak tokon $34.457, iha 2016 tun ba tokon $24.826, iha 2017 tun ba ba tokon $21.962 no iha 2018 ne’e tun ba $14.679”.

Tanba ne’e HASATIL preokupa tebes ho tendénsia negativa ida ne’e no larefleta ba prioridade ne’ebé haktuir iha Planu Estratéjiku Dezenvolvimentu Nasionál 2011-2030, nune’e husu Governu tenke fó atensaun maka’as no investe ba promove produsaun ai-han rai-laran no produtu lokál.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here