Prezidente Komisaun Ezekutivu Kaixa Jerál Depózitu, S.A, Paulo Moita Macedo, hamutuk ho ninia ekipa halo audiénsia ho Primeiru-Ministru, Taur Matan Ruak, iha Palásiu Governu, ohin. Imajen mídia GPM

DILI, (TATOLI) – Prezidente Komisaun Ezekutivu Kaixa Jerál Depózitu, S.A, Paulo Moita Macedo, hamutuk ho ninia ekipa halo audiénsia ho Primeiru-Ministru, Taur Matan Ruak, hodi reafirma ezisténsia iha Timor-Leste, ne’ebé liu ona tinan 100.

“Audiénsia ho Primeiru-Ministru kona-ba kaixa jerál depózitu reafirma prezensa iha Timor-Leste, ba dezenvolvimentu ekonomia atu fó apóiu ba sidadaun”, tenik ba jornalista sira hafoin sorumutu ho Xefe Governu, ohin iha Palásiu Governu.

Nia hatutan parte seluk mós atualiza evolusaun Kaixa Jerál Depózitu ne’ebé iha rekapitalizasaun signifikativa husi parte Estadu Portugés nomós relata preokupasaun balun husi atividade bankária iha Timor-Leste relativu ho Kaixa. “Nune’e, ami hetan opiniaun pozitivu mesmu diskusaun ne’e lais”.

Biar nune’e, ezekutivu ne’e optimista ho fundu ne’ebé banku ne’e iha atu investe di’ak liután iha Timor-Leste.

“Kaixa Jerál Depózitu iha konjuntu fundu ne’ebé signifikativu ne’ebé disponível atu investe iha Timor-Leste, maibé presiza harre mós projetu ne’ebé tuir nesesidade no informasaun husi kontabilístika husi parte empreza ba Kaixa Jerál Depózitu hodi bele halo análiza risku. Presiza haree mós projetu sólidu ho garantia sira, serake naton ona”, katak.

Nia mós rekoñese ho lejislasaun intensivu ne’ebé agora dadauk parte governu Timor-Leste halo, bele fasilita posibilidade ba finansiamentu.

Kaixa Jerál Depózitu nia prezensa ne’ebé liu ona tinan 100, hakarak atu iha tan ba tempu naruk hodi tulun ekonomia nasaun.

Entretantu, Banku Nasionál Ultramarinu (BNU) hanesan banku dahuluk ne’ebé instala iha Timor-Leste desde okupasaun Estadu Portugés.

Inisialmente, ho obrigadasaun husi Estadu Portugés estabelese reprezentante sede iha Timor iha tinan 1902, ho provizóriu tanba difikuldade lojístika no distansia entre Timor-Leste no Portugal.

Inagurasaun Ajénsia Bankária dahuluk ho edifísiu iha tinan 1912, iha Kapitál no iha 1915 komesa sirkula notas privativa dahuluk (konta bankária privadu).

Hafoin rekuperasaun edifísiu filial BNU, loke fila fali ba públiku iha loron 10 jullu 2001, ne’ebé konfirmadu no reforsa ho prezensa bankária iha nasaun post-konfilitu Timor-Leste.

Agora dadauk, banku antigu ne’e espande ona ninia surkursál no ATM ba sidade no munisípiu seluk, no iha ona kliente barak iha territóriu, nune’e mós iha ona produtu barak liga ho mudansa teknolojia no nesesidade povu.

Produtu ida ne’ebé mak BNU kooperasaun ho Governu mak hamutuk ho Autoridade Aduaneira ho Komisaun Reforma (KRF) asina ona protokolu kooperasaun, hodi harii administrasaun aduaneiru ne’ebé modernu no transparente, ba pagamentu elektróniku ho sistema Terminál Pagamentu Automátiku (TPA) iha Autoridade Aduaneira, nune’e hahú loron 1 maiu 2018 pagamentu eletrótiku bele halo iha aeroportu Dili no edifísiu sentrál aduaneira no ba implementasaun iha Fronteira Batugade no Suai.

Nune’e mós governu liuhosi KRF hahú loron 11 juñu 2018 aplika ona sistema pagamentu eletróniku ho kartaun BNU ba pagamentu taxa no impostu.

Sistema pagamentu ne’e rasik, konsidera bele redús tempu iha prosesu importasaun no esportasaun, fasilita komérsiu sira no suporta estabelesimentu administrasaun alfándega ne’ebé mak modernu no transparente.

Iha loron estabelesimentusistema ne’e, bainhira selu taxa ba alfándega, koima no impostu iha aeroportu, bele uza kartaun BNU ou kartaun viza hodi bele halo importasaun uza passaporte no deklarasaun husi alfándega no sei uza Automated System For Customs Data (Asycuda World), enkuantu bainhira seidauk iha kartaun hodi halo tranzasaun, bele cash iha sukursál BNU.

Alende ne’e, sistema interligasaun entre Planeamentu Rekursu Governu (GRP-sigla inglés) ho R-Timor (rede transferénsia iha momentu atuál) ne’ebé aplika husi Banku Sentrál Timor-Leste (BCTL-sigla portugés), atu halo transferénsia orsamentu ba programa governu hanesan idózu, bolsa da mãe, merenda eskolár no seluk tan, liga ona ona banku sira hanesan BNCTL, BRI, Mandiri, inklui BNU.

Jornaliata: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here