DILI, (TATOLI) – Atleta defisiente Teofilo Freitas, oan ki’ak ida, halo istória únika iha Ázia, liuliu iha ASEAN Paralímpiku, tanba manan “Medalha de Ouro” ka medalla osan mean rua dala ida, bainhira kompete ho nasaun 43 iha kontinente Ázia, ne’ebé realiza iha Jakarta-Indonézia, 2018.
“Ne’e, istória dahuluk iha Asian Paragames ba Timor-Leste”, hateten prezidente Komité Paralímpiku Nasionál Timor-Leste (CPNTL-sigla portugés), iha nia intervensaun, bainhira fila husi Jakarta-Indonézia ho atleta sira, iha Sekretáriu Estadu Juventude no Desportu (SEJD), Lecidere-Díli, domingu (14/10).
Nia akresenta bainhira sai husi TL hodi ba kompete, sira iha kompromisu katak bele lori rezultadu ruma mai TL, la di’ak liu maibé pelumenus husi topu 10 mai karaik, maibé rezultadu kontráriu. Katak, TL bele sai mós primeiru lugár iha modalidade balun.
“Ida ne’ebé ami espera atu hetan ranking sia ou ualu, ami konsege soe nasaun 19 husi nasaun 43, husi federasaun sira hotu; balun lakon, balun manan. Manan mós kosar”, dehan prezidente CPNTL.
Iha fatin hanesan, atleta defisiente Teofilo Freitas ba jornalista sira katak sente kontente tebes ho rezultadu no emosionante nomós impresionadu nune’e nia matan-been tuun, hodi haree bandeira nasionál no ino nasionál “Pátria, Pátria ” bele sa’e no hananu entre nasaun seluk.
“Ha’u matan-been tuun; sentimentu ida kontente tebes, vitória ba Timor, ba povu Timor no ba dignidade Timor”, haktuir atleta defisiente Teofilo Freitas.
Atleta ne’e mós reforsa sente Kontente tebes tanba hori uluk to’o agora, iha nivel ASEAN Games, foin iha nia, mak primeravez dada sa’e ita-nia bandeira iha Indonézia-Jakarta, estádiu Gelora Bung Karno, Palembang.
“Ha’u sente kontente ida, kontente liu kedas, bele halo istória foun ida ba ita-nia rai doben Timor nomós hatudu ba kontinente Ázia, maske ita seidauk sai membru ba ASEAN (organizasaun sudezte áziatika-sigla inglés) maibé ita konsege dada sa’e ita-nia bandeira hamutuk ho membru ASEAN nian iha ne’ebá. Ha’u sente sai embaixada Timor nian ida ba ASEAN”, konsidera atleta Teofilo Freitas.
Nia mós konfirma ba TATOLI katak konsege hetan vitória ida ne’e tanba prinsípiu. Katak, maske durante ne’e iha impase polítika, rona isu oioin, dalaruma osan la iha, maibé tan dignidade nasaun, la haree ba osan sira ne’e, iha de’it prinsípiu oinsá hamorin Timor nia naran, lori Nasaun ba mundu, katak Timor mós eziste no bele.
“Ha’u iha prinsípiu haka’as án tanba ita seidauk sai membru ASEAN, maibé karik ha’u mak sai primeiru lugar iha momentu ida hanesan ne’e, istória ida ba ita-nia rain”, dehan atleta difisiente, Teofilio Freitas, hodi agradese ba família, kolega, komunidade nomós governu tan bele apoiu mós durante ne’e.
Iha biban ne’e mós atleta Pascoela dos Santos Pereira mós hato’o agradesimentu. “Ha’u kontente tebes. Nune’e, hato’o ha’u-nia agradesimentu ba Maromak, família ne’ebé mak dukung (apoiu) ha’u no pelatih (treinadór) ba rai Timor no ba Governu”, agredese atleta Pascoela dos Santos.
Ho prestasaun ne’ebé atleta na’in defisiente na’in rua ne’e hatudu, Ministra Edukasaun, Juventude no Desportu (MEJD), Dulce de Jesus Soares, bainhira simu atleta timoroan na’in rua ne’e, liuhusi konferénsia imprensa, iha salaun VIP (Very Important Person), Aeroporto Nicolau Lobato, afirma ho dedikasaun no talentu atleta defisiente sira nian to’o realiza sira-nia mehi.
“Ida ne’e sai ezemplu boot ida ba ema hotu iha Timor, liuliu sira ne’ebé hili dalan sai ba área desportu nian”, hateten governante governu konstitusionál da-ualu ne’e.
Governante ne’e informa MEJD no SEJD iha kompromísiu kontinua fó apoiu ba atleta sira, nune’e bele fó prestasaun ne’ebé mak di’ak liután.
Nia husu ba atleta sira katak ne’e hanesan faze inisiál, tenke kontinua treinu maka’as liután nune’e iha futuru ba tuir tan kompetisaun.
“Governu Timor-Leste kontinua apoiu, liuhusi treinadór sira, oinsá teknikamente bele hanorin atleta sira oinsá bele sai ema ne’ebé komprende liu iha sira-nia área. Teofilo ho Pascoela, sira rua sai ezemplu boot ba ita hotu”, dehan ministra Dulce de Jesus Soares.
Iha fatin ketak, SEJD Nélio Isaac Sarmento, husu ba CPNTL atu prosesa lalais relatóriu gráfiku prestasaun atleta defisiente sira hodi diriji ba SEJD atu bele konkova enkontru ekstraordináriu ida oinsá atu bele atribui prémiu ba atleta vensedór na’in rua; Teofilo Freitas ho Pascoela dos Santos Pereira.
“Bainhira ami simu ona relatóriu sira (gráfiku prestasaun atleta sira-red), sei iha reuniaun ekstraordináriu ba Komisaun Nasionál ba Desportu, sei hasai rezultadu kona-ba apoiu saida mak ba iha Teofilo ho Pascoela”, katak Nélio Isaac Sarmento.
Reprezentante Família, Francisca Dia Ximenes Pereira, iha biban ne’e, agradese mós ba entidade hotu ne’ebé mak apoiu ona sira-nia oan hodi lori Timor-Leste ba reprezenta iha atividade desportiva sira, ikus mai bele hetan rezultadu hodi oferese hikas ba nasaun.
“Ha’u agradese ba ekipa, treinadór ne’ebé mak akompaña, fó korajen sira, fó apoiu másimu, konvida sira ba treinu bebeik, no fim ha’u la espera, oan na’in rua, sira lori ha’u kontente tebes”, agredese família.
Ekipa atleta defisiénsia Timor-Leste fila hikas mai Dili, ho aviaun Sriwijaya Air, tuku 14:26 no simu direta husi SEJD, família, komunidade ho belun sira, ne’ebé kuaze hothotu hatais kamizola hakerek liafuan: “LABELE HAREE BA AMI-NIA DEFISIÉNSIA MAIBÉ HAREE BA AMI-NIA ABILIDADE. AMI MÓS BELE” hodi simu iha euforia ida kontente tebes.
Jornalista: Rafy Belo
Editora: Rita Almeida
