Primeiru Ministru Taur Matan Ruak akompaña hosi Ministru Negósiu Estranjeiru Japaun, Taro Kono, ohin, ofisiálmente inaugura ponte HINODE ba públiku.

DILI, (TATOLI) -Primeiru Ministru Taur Matan Ruak, akompaña hosi Ministru Negósiu Estranjeiru Japaun, Taro Kono, ohin, ofisiálmente inaugura ponte komoro III ba públiku, ho naran “Lorosa’e”.

Ponte HONODE-BASHI ou Lorosa’e nia naruk metru. 250 no luan metru 11.55, harii tanba hetan apoiu finanseira hosi Governu Japaun ho montante Yen 2.605, konverte ba Dolar 23.7 Millaun ne’ebé  implementa hosi JICA.

Primeiru Ministru, Taur Matan Ruak hodi povu Timor-Leste no governu nia naran agradese ba apoiu hosi governu Japaun ba dezenvolvimentu infraestrutura bázika, edukasaun, Saúde, agrikultura, mudansa klimátika no seluk tan ba propriedade Timor-Leste nian.

“Lori governu no povu timoroan nia naran, liuliu viajante, emprezáriu no sidadaun, sira ne’ebé uza ponte ida nee, ha’u hakarak aprezenta ba sira ne’ebé partisipa ona ka konkretiza obra ida nee, ha’u nia agradesimentu kle’an, hahi ba ita boot nia servisu esforsu no dedikasaun koletivu,” Taur Matan Ruak agradese iha serimónia inaugurasaun, ponte, foin lalais ne’e, iha Komoro.

Nia espera Timor-Leste ho Japaun kontinua hametin lasu istóriku entre nasaun rua, basa obra ida nee hatudu kontinuasaun ba investimentu governu Japaun ba konstrusaun estadu direitu demokrátiku, la’ós de’it ba ponte, estrada, portu, eskola, saúde, bee moos, irrigasaun, diversifikasaun ekonomia no seluk tan.

Iha fatin hanesan Ministru Taro Kono dehan, Governu Japaun sei kontinua fó apoiu ba Dezenvolvimentu nasaun Timor-Leste.

Nia afirma, ponte HINODE sei kontinua hametin no reforsa relasaun entre rai rua.

Entretantu Projetu konstrusaun Ponte HINODE-BASHI  hahú iha Agostu 2016 no remata iha fulan kotuk, obra ne’e implementa hosi kompañia Tobishima, corporation no ninia konsórsiu.

Naran HONODE-BASHI aprova hosi Konsellu Ministru bazeia ba pedidu Japaun nian ho naran “Hinode-Bashi” ho lian tetum “Lorosa’e”.

 Jornalista: Agapito dos Santos

Editór : Manuel Pinto

HAKEREK NO HATÁN

Please enter your comment!
Please enter your name here