Prezidente Kámara Komérsiu Indústria Timor-Leste (CCI-TL sigla portugés), Oscar Lima, simu Prezidente Repúblika, Francisco Guterres Lú Olo, hodi partisipa kongresu CCI-TL iha Novu Turizmu, ohin. Imajen António Goncalves

DILI, (TATOLI) – Óscar Lima re-eleitu ba Prezidente Kámara Komérsiu Indústria Timor-Leste (CCI-TL sigla portugés) nian ba períodu 2018 to’o 2022 iha kongresu nasionál ba datoluk ne’ebé CCI-TL organiza.

Óscar kontinua lidera CCI-TL tanba kongresista hamutuk 251 ne’ebé partisipa iha asembleia jerál CCI-TL hodi hili fali sira-nia prezidente foun ba períodu tuirmai no maioria husi sira ho totál 136 fó vitória ba nia bainhira kompete ho Claricia Lay ne’ebé hetan votu menus ho totál 114 no ida ho votu nulu.

Prezidente eleitu CCI-TL, Óscar Lima, hatete demokrasia iha lakon no manán, tanba ne’e ida ne’ebé manán CCI-TL maka manán.

“Ha’u sei ladiskrimina nein ema ida, buka oinsá maka serbisu hamutuk atu lori CCI ne’e bá oin, ida ne’e maka importante liu ba ha’u”, nia promote hafoin hetan vitória ne’e iha Novu Turizmu, sesta ne’e.

Iha nia kampaña antes eleisaun, Óscar deklara buat barak tebes lakonsege halo durante mandatu husi períodu 2014-2018, maibé hafoin konkista vitória ne’e buka oinsá atu halo.

“Entaun ita hotu-hotu buka halo, organiza filafali ita-nia CCI, tanba CCI presiza ema hotu nia apoiu, la’ós ami mesak de’it, presiza intelektuál, munisípiu, asosiasaun fundadór sira, hotu-hotu hamutuk lori CCI ne’e bá oin”, afirma.

Nia hatutan tan: “CCI la’ós Óscar Lima nia kompañia privada, CCI reprezentante setór privadu. Setór privadu iha ami-nia liman, maibé ami reprezenta simplesmente emprezáriu sira, la’ós ami maka atu sai na’in ba CCI, CCI na’in emprezáriu hotu nian”.

Óscar dehan hafoin eleitu, buat ne’ebé sei halo iha tempu badak maka  dedika uluk atensaun ba membru sira, trata sira-nia problema karik ho Governu kona-ba pagamentu, buka nafatin aprosimasaun ho banku sira para fó kréditu no buat barak ne’ebé sei halo.

“Ita haree bá finansiamentu, ami sei hein mós finansiamentu balun ne’ebé mai husi parseiru importante mak Governu, buka aprosimasaun ne’ebé maka di’ak para bele hetan apoiu husi Governu oinsá maka ami bele fó apoiu ba ami-nia munisípiu sira, ida ne’e maka ami-nia programa importante”, katak.

Nia salienta mós prioridade ida maka buka atu dezenvolve CCI-TL iha munisípiu sira atu ema bele hatene no respeita membru sira, tanba CCI parseiru Governu nian bainhira Governu hateke ba CCI-TL ne’e hetan.

Kona-ba empreza ki’ik sira, Oscar dehan tenke buka atu fó treinamentu, sira iha kapitál tanba ne’e buka oinsá maka atu jere ho di’ak para labele monu kuandu lahalo jestaun di’ak maka empreza labele la’o.

Hatán kona-ba estatutu CCI-TL nian sei iha tempu atu diskute, maibé ida antigu kontinua serve atu hala’o nafatin kna’ar loroloron.

Claricia Lay ne’ebé derrota iha eleisaun ne’e katak lakon ka manán ne’e buat ketak ida. “Maibé I do my best. Hanesan feto emprezária ha’u halo saida maka ha’u sente di’ak ha’u, halo. Parese tuir kongresista sira katak tempu seidauk to’o mai ha’u, tenke serbisu barak liu, maibé ha’u atu fó korajen de’it ba feto maluk sira katak mezmu feto ita labele sente tauk, labrani foti desizaun”.

Emprezária timoroan, Clarissa Lay. Imajen FP Clarissa Lay

Hanesan feto dahuluk iha CCI-TL ne’ebé kompete ho mane maski lakon, maibé nafatin fó apoiu ba CCI-TL nu’udar emprezária.

“Ha’u fó parabéns ba ha’u-nia mane maluk no hanesan maun. Ha’u kontente, laiha uitoan sente triste tanba hanesan feto ha’u halo saida maka ha’u bele halo”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here