Komandante Jerál Polísia Nasionál Timor-Leste (PNTL), Komisáriu Júlio da Costa Hornay

DILI (TATOLI)—Komandante Jerál Polísia Nasionál Timor-Leste, Júlio da Costa Hornay, hateten situasaun jerál iha territóriu Timor laran tomak la’o hakmatek, katak, laiha problema boot ne’ebé maka bele konsidera tenke toma atensaun másimu.

Nia haktuir, insidente hanesan kazu omesídiu iha Postu Administrativu Laga, Munisípiu Baucau, semana kotuk, ne’ebé hamate joven ida iha Laga nomós iha Luro (Lospalos), Liquiça no Dili, la grave.

“Hanesan kazu iha Laga, polísia tenta atu halo prosesu investigasaun maibé família hosi matebian lakohi koopera, katak, la fó autorizasaun ba autoridade kompetente atu halo autópsia para hatene nia kauza,” nia dehan ba jornalista sira iha Palásiu Prezidente Nicolau Lobato, Bairru Pité, Dili, sesta ne’e, hafoin hala’o enkontru ho Prezidente Repúblika, Francisco Guterres Lú Olo, hodi ko’alia kona-ba seguransa rai laran.

Hornay haktuir, iha tempu ne’ebá, Komandu PNTL kontatu Prokuradoria Jerál Repúblika hodi orienta prokuradór hamutuk ho polísia to’o iha Laga hodi ko’alia ho família para entrega mate isin atu halo autópsia, maibé família lakohi, nune’e mós kazu omesídiu iha Luro.

Nia dehan autópsia ne’e importante teb-tebes iha prosesu investigasaun nomós prosesu desizaun iha Tribunál, tanba ida ne’e evidénsia ne’ebé signifikadu liu atu determina kauza mate ne’e saida.

Komandante Jerál ne’e apela ba komunidade katak estabilidade iha sidadaun sira nia liman no husu ba inan aman atu halo prevensaun ba oan sira nia atitudi, nune’e bele hapara átu (acto) kriminalidade iha nasaun ne’e.

Kona-ba asidente, Hornay dehan, iha tempu bailoron ne’e, konstrusaun estrada iha territóriu Timor laran la’o namanas hela, tan ne’e, husu ema hotu atu la’o kuidadu án tanba rai rahun maka’as halo kondutór la haree malu.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here