Ministru Negósiu Estranjeiru Japaun Taro Kono ka’er liman ho Ministru Prezidénsia Konsellu Ministru, Agio Pereira ho kapasidade ministru Negósiu estranjeiru no kooperasaun Interinu, iha Salaun Diplomata MNEC Praia dos Qoqeiros Dili, ohin.

DILI, (TATOLI)—Ministru Negósiu Estranjeiru Japaun Taro Kono hateten, Governu Japaun sei kontinua fó apoiu ba dezenvolvimentu Timor Leste liuliu iha área edukasaun, Infraestrutura, Mudansa klimátika no seluk tan.

Diplomata Japaun hato’o kompromisu ne’e hafoin asina nota entendimentu (MoU) ho ministru Negósiu estranjeiru no kooperasaun Interinu, atúal Ministru Prezidénsia Konsellu Ministru, Agio Pereira kona-ba apoiu bolsu estudu ba timoroan iha tinan 2019, iha Salaun Diplomata MNEC Praia dos Qoqeiros Dili, ohin.

 ʺJapaun no Timor Leste parseiru importante, tanba ne’e ha’u konkorda ho Ministru Agio atu hametin kooperasaun entre estadu rua iha área haat,ʺ hateten, MNE Japaun.

Área importante hirak ne’e hanesan, dezenvolvimentu rekursu umanus liuliu apoiu bolsu ba timoroan hodi estuda iha Universidade Japaun, Mudansa Klimátika, Infraestrutura, ekonomia, defeza .

ʺHa’u kontente ho vizita ne’e atu reforsa ita relasaun entre nasaun rua, ha’u sei mai vizita fali nasaun ne’e,ʺ nia promete.

Ministru, Agio Pereira hateten, Governu konsidera Japaun parseiru importante tanba fó ona apoiu ba dezenvolvimentu nasaun.

“Primeiru Ministru no Konsellu Ministru mós konsidera importante,” Agio afirma

Ho kontinua dehan, kona-bá mudansa klimátika, Japaun atravesa JICA sei kontinua apoiu liuliu ba responde dezastre naturais.

“Timor Leste no Japaun iha empeñu bo’ot atu luta hasoru mudansa Klimátika no preparasaun ba dezastre naturais ‘area ne’ebé Japaun liuhosi JICA apoiu bo’ot tebe-tebes ba ita nia nasaun,” reforsa tan.

Atravesa, oportunidade ne’e, Ministru lori Governu TL nia naran agradese ba apoiu estadu no povu Japaun. Memorandum ohin, governu rai rua liuhosi projetu bolsu estudu dezenvolvimentu rekursu umanu hodi haruka timoroan na’in 8 sei ba estuda iha Japaun hodi hasai Mestradu iha área Administrasaun Públiku, dezenvolvimentu rural no indústria, transportasaun, urbana, dezenvolvimentu ambientál. Projetu ne’e sei implementa hosi Instituisaun Nasionál Administrasaun Públika (INAP) no JICA.

Jornalista:Agapito dos Santos

Editór : Manuel Pinto

HAKEREK NO HATÁN

Please enter your comment!
Please enter your name here