DILI (TATOLI)—Organizasaun Mundiál Saúde (OMS) ba Timor-Leste servisu hamutuk ho Ajénsia Kooperasaun Internasionál Koreanu (KOICA) ajuda laptop hamutuk 300 ba Ministériu Saúde (MS) hodi fasilita servisu ba programa Kuidadu Saúde Primária.

“Ha’u kontente tanba, agora ne’e iha tan oportunidade ida hodi bele servisu hamutuk ho KOICA hodi fó apoiu ba programa Saúde na Família, Ministériu Saúde nian hodi entrega laptop 300,” Dr Rajesh Pandav, Reprezentante OMS ba Timor-Leste hato’o liuhosi komunikadu ba Ajénsia Tatoli.

Laptop hirak ne’e fó apoiu tomak ba programa emblemátika kuidadu saúde primária MS nian, Saúde na Família, ne’ebé mak lansa iha Abríl 2015 no agora daudaun iha implementasaun ba faze daruak.

 “Ida ne’e sei ajuda ekipa pesoál saúde sira ne’ebé mak hala’o vizita domisiliáriu hodi rejistu dadus ho lalais, ne’ebé mak sei fortaleza sistema informasaun saúde atu nune’e dadus hirak ne’e disponivel tuir kualidade padraun ne’ebé iha,” Pandav haktuir.

Laptop hirak ne’e entrega ba Vise Ministra Kuidadu Saúde Primária no Ministra Saúde em ezersísiu, Élia A. A. dos Reis Amaral iha 5 outubru husi Pandav no Kim iha MS hamutuk ho serimónia entrega sertifikadu eliminasaun sarampu nian.

“Ha’u espera ami nia prezente husi Koreanu sira bele fó kontribuisaun ida atu promove dijitalizasaun informasaun saúde no ikus mai bele hasa’e asesibilidade ba ema vulneravel iha Timor-Leste,” hateten Kim. Relasiona ho Saúde na Família, OMS servisu hamutuk ho programa ne’e dezde programa ne’e hahú.

Entretantu, Iha Juñu tinan ida ne’e, OMS mós entrega ona motorizada 65 ba programa Saúde na Família. Motorizada 65 ne’e distribui ba ekipa Saúde na Família iha territóriu tomak hodi bele hala’o vizita domisilíariu hanesan parte husi programa ida ne’e.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here