iklan

NASIONÁL, EDUKASAUN

ME Distribui Matéria Ezame Nasionál

ME Distribui Matéria Ezame Nasionál

Vise Ministru Edukasaun Juventude no desportu, João Zacarias Freitas Soares, reprezenta Ministra Edukasaun, entrega matéria Ezame nasionál

DILI (TATOLI)-Ministériu Edukasaun-ME ohin, hahú distribui matéria ezame nasionál hosi Ensinu Báziku no Ensinu Sekundária jerál ba Munisípiu sanulu resin rua inklui Rejiaun Administrativu Espesiál Oecusse-Ambeno (RAEOA) ne’ebé tuir oráriu sei hala’o iha loron segunda (15/10) iha territóriu.

Vise Ministru Edukasaun Juventude no desportu, João Zacarias Freitas Soares ne’ebé reprezenta Ministra Edukasaun hateten, sei garante matéria Ezame  nasionál sei la espalla iha públiku durante prosesu distribuisaun. Tanba, ME koopera ho Polísia Nasionál Timor Leste hodi akompaña Diretór Munisípiu sira hodi lori to’o munisípiu ida- idak.

Matéria ba dixiplina sira ne’e kompostu hosi siénsia sosiais, Naturais no jerál, hanesan ekonomia no métodu Kuantitativu, Inglés, istória, Sosiolojia, Jeografia,, Matemátika, Portugés, Ciẽncias Fíziku Naturais no seluk tan.

ʺMatéria Ezame  hotu iha segel, Superintendente edukasaun no diretór sei akompaña to’o munisípiu hotu-hotu hodi asegura ita nia dokumentu ne’e,ʺ garante Governante iha Sentru Imprime Nasionál iha Kampu Merdeka Komoro Dili.

Governante ne’e espera ezame  nasionál ne’e sei la’o ho susesu tanba hetan kolaborasaun servisu hahú hosi diretór eskola to’o Ministériu. Total estudante finalista hahú ensinu báziku to’o Sekundáriu hamutuk rihun 50.548, hosi Ensinu Báziku 30.291 no ensinu sekundária jerál 17.034.

Vice Ministru mós husu ba Finalista sira atu estuda maka’as hodi pasa iha ezame, enkuantu ba Diretór eskola sira atu halo servisu ho rigor hodi evita manipulasaun durante atividade ne’e la’o.

ʺAlin sira prepara imi nia aan, saúde, mentalidade atu iha segunda feira bele tuir ezame  ho di’ak no saudavel, ba Profesór sira atu akompaña nafatin sira atu ezame  nasionál bele la oho susesu, reforsa tan. Governu uza osan rihun $ 192 mill hodi imprime matéria Ezame  nasionál.”

Jornalista: Agapito dos Santos

Editór : Manuel Pinto

iklan
iklan

Leave a Reply

iklan
error: Content is protected !!