Enkontru Konsellu Ministru, ohin. Foto António Goncalves

DILI (TATOLI)- Primeiru-Ministru, Taur Matan Ruak prezide Sorumutu Konsellu Ministru semanál, ba semana daruak fulan Outubru nian, Kuarta-feira ne’e iha Palásiu Governu, ho ajenda sira hanesan, Aprovasaun Rezolusaun Governu nian fó donativu $170 mill ba Repúblika Indonézia atu ajuda hakmaan vítima rai-nakdoko no Tsunami iha Provínsia Sulawesi Oriente (Palu Sigi, Dongala).

Konsellu Ministru mós aprova Rezolusaun Governu nian kona-ba Aprovasaun Kontratu Akizisaun Interese Partisipativu no Direitu iha kampu Gretaer Sunrise, partisipasaun Timor-Leste nian iha operasaun petrolífera no transferénsia interese partisipativu no direitu sira a favór ba Timor Gap-EP ka ninia subsidiária hodi bele hetan no jere sasán hirak refere, nu’udar reprezentasaun Estadu Timor-Leste.

Konsellu Ministru mós analiza no rona aprezentasaun hosi Ministru Transporte no Telekomunikasaun nian kona-ba Projetu Ligasaun Transporte Marítima ba Area Kosta Norte Territóriu nian. Projetu ne’e nu’udar rezultadu kooperasaun entre Governu Timor-Leste no Alemaña, ne’ebé hahú kedas iha tinan 2004, hodi dezenvolve transporte Marítima no infra-estrutura Marítima nian. Komponente prinsipál hosi projetu ne’e mak sei halo konstrusaun ba ró-ahi foun pasajeiru nian atu halo ligasaun Marítima ba kosta norte tomak. Governu Japaun mak apoia projetu ne’e no sei halo konstrusaun ba terminal foun ba pasajeiru iha Dili no reabilitasaun terminal Marítima iha Oekusi no Ataúru.

Aleinde ne’e MTK mós aprezenta Dekretu Lei kona-ba Alterasaun dahuluk Dekretu Lei n.o 1/2003, loron 10 fulan Marsu, Lei Baze Aviasaun Sivíl. Alterasaun Dekretu Lei ne’e Konsellu Ministru aprova ona ho objetivu atu halo klasifikasaun ba aeroportu internasionál Díli no Suai.

Konsellu Ministru mós aprova naran Ponte Komoro III tuir pedidu Japaun nian ho naran “Hinode-Bashi” ho lian tetum “Lorosa’e”. Konstrusaun Ponte Komoro III ne’e nu’udar doasaun hosi povu no Governu Japaun ba povu Timor-Leste, ne’ebé tuir planu sei inaugura iha loron 12 fulan Outubru.

Konsellu Ministru mós aprova Lei Orgánika Ministériu Estadu Prezidénsia Konsellu Ministru (MEPCM), no Ministériu Reforma Lejizlativu no Asuntu Parlamentár (MRLAP) atu fasilita Ministériu rua ne’e bele hala’o sira nia kna’ar diak liután.

Ikus, iha reuniaun Konsellu Ministru nian ne’e mós, asina deklarasaun Maubisi II ne’ebé inisia hosi Sekretária Estadu ba Igualdade no Inkluzaun, Maria José Fonseca, Deklarasaun Maubisi ne’e atu asegura prinsípiu inkluzaun, toleránsia no igualdade jéneru, ne’ebé prevee ona iha Planu Dezenvolvimentu Estratéjiku Nasionál i reflete ho Programa VIII Governu Konstitusionál nian iha asaun governativa.

 Komunikadu Imprensa

HAKEREK NO HATÁN

Please enter your comment!
Please enter your name here