Primeiru Ministru, Taur Matan Ruak, ohin (10/10) dadeer ne’e, iha Palásiu governu hetan surpreza hosi funsionáriu sira, membru governu balun, ho membru parlamentu nasionál relasiona ho Primeiru Ministru nia aniversáriu ba dala-62. FOTO GPM

DILI (TATOLI)—Primeiru Ministru, Taur Matan Ruak, ohin (10/10) dadeer ne’e, iha Palásiu governu hetan surpreza hosi funsionáriu sira, membru governu balun, ho membru parlamentu nasionál relasiona ho Primeiru Ministru nia aniversáriu ba dala-62.

Eis Prezidente da Repúblika ne’e espresa nia sentimentu orgullu no agradese ba surpreza ne’ebé mak iha. Ba nia ida ne’e foin mak akontese dahuluk hafoin asume knaar nu’udar Primeiru Ministru.

“Agradese ba imi nia jestu. Ha’u hanoin primeira-vés, ha’u simu imi hotu iha fatin ida ne’e, depois de sa’e Primeiru Ministru,” Primeiru Ministru VIII governu ne’e espresa nia sentimentu.

Nu’udar lutadór, Jenerál Taur Matan Ruak dehan, sura hosi Komandu da Luta, Kay Rala Xanana Gusmão, Eis Primeiru Ministru, Mari Alkatiri, Laureadu Nobel da Pas, Jose Ramos Horta, atuál Prezidente Repúblika no veteranus sira seluk, iha esperansa ida de’it ba foin sa’e sira, “Hatutan ami nia luta”.

Basa nia dehan, nasaun Repúblika Demokrátiku Timor-Leste la fó de’it, sosa ho mate, terus tanba ne’e esperansa hosi katuas sira nian ba juventude mak “ami hakarak imi orgullu ba konkista ne’ebé ita iha. Ida ne’e mak halo ema iha nasaun seluk respeita ita, tanba ita rasik ho terus no sakrifísiu ita hari nasaun ne’e.”

“Projetu ida ne’e seidauk hotu, nia iha faze ida, ita bolu dehan segunda faze que difisil liu. Dala barak jornalista ho malae sira husu, hari nasaun no halo funu ida ne’ebé mak fasil liu ?”

Ha’u Nia resposta “Halo funu fasil liu. Tanba ita haree ida de’it, harii nasaun iha buat barak los, ida oinsá ita nia oan sira nia futuru, fó han ba família sira hotu, fó servisu ba foin sa’e sira, hadi’a estrada iha fatin hotu-hotu, inklui sira ne’ebé iha foho leten ne’ebá.”

“Halo edukasaun, saúde bee moos ba família sira hotu, ne’e dezafiu ida boot. Tanba ne’e imi sira ne’ebé servisu iha uma ida ne’e (servisu ho PM) iha responsabilidade boot. Maibé buat hotu todan no boot ita sei konsege karik ita halo ho domin,” Primeiru Ministru hameno ba nia funsionáriu sira.

Entretantu aleinde de funsionáriu gabinete primeiru ministru nian, partisipa iha serimónia surpreza Vice Ministru Edukasaun João Zacarias no membru parlamentu nasionál, Cornelio Gama alias L-7 ho kapasidade nu’udar xefe bankada Partidu Libertasaun Popular.

Serimónia simples ne’e hetan mós animasaun teatru “Koñese Primeiru Ministru” hosi estudante eskola primária no 9 Vila Verde.

Primeiru Ministru Taur Matan Ruak, moris iha Osso-Huna, Baguia, Munisípiu Baukau, 10 Outubru 1956. Taur Matan Ruak, oan mane dahuluk husi mane na’in 3 no feto na’in 5, ai fuan domin António de Vasconcelos no Albertina Amaral.

Iha 1960 nia (Taur Matan Ruak) muda mai iha Dili hamutuk ho ninia tiun. Iha 1963 nia tama eskola primária no ramata ninia estudu iha 1968. Iha 7 Dezembru 1975, Indonézia invade Timor-Leste. Iha momentu ne’ebá, Taur Matan Ruak ho tinan 19 tama FALINTIL – FRETILIN nia liman kro’at ne’ebé foin kria. Durante tinan tolu tuirmai, povu timoroan selu folin aas ne’ebé rezulta ema 100.000 mate.

Nu’udar kombatente, nia partisipa iha luta hasoru militár Indonézia nian iha Dili, Aileu, Maubisi, Ossu, Venilale, Uatulari no ikus liu iha Laga, iha ne’ebá to’o ikus nia hela ba.

Taur Matan Ruak hahú hetan fiar hodi simu knar iha FALINTIL nu’udar komandu iha 1976. Durante faze ida-ne’e, FRETILIN afirma katak kontrola 80% territóriu.

Husi 1976 to’o 1979, Taur Matan Ruak tuur iha estrutura FALINTIL laran iha setór militár rua parte leste nian: Setór Sentru Leste no Setór Ponta Leste. Hafoin nia sai Komandante Kompañia ida.

Iha 1977 nia rohan, militár Indonézia hahú Operasaun ba Serku no Anikilamentu ne’ebé halo forsa rezisténsia mate barak. Iha tinan tuirmai, forsa Indonézia sira konsege halakon 80% husi forsa Rezisténsia, hamutuk ho sira-nia baze apoiu.

Iha 22 Novembru, 1978, baze Rezisténsia ikus nian rahun tiha. Kay Rala Xanana Gusmão, Taur Matan Ruak no membru Rezisténsia sira seluk hasoru malu fali iha loron tuirmai iha foho Legumau hodi kontinua operasaun gerrilla.

Iha 31 Marsu 1979, Taur Matan Ruak hetan kapturasaun husi militár ABRI iha área Viqueque bainhira nia hala’o nia misaun hodi buka tuir sira-ne’ebé salva an husi Operasaun Serku no Anikilamentu. Nia konsege halai hafoin loron 23 no hetan fali FALINTIL iha foho.

Iha Marsu 1981 nia sai Kolaboradór ba Xefe Estadu-Maiór FALINTIL no komandante operasionál ne’ebé responsabiliza iha setór leste no, ikus mai, iha setór oeste.

Iha Marsu 1983, Rezisténsia no reprezentante sira militár Indonézia nian deside halo akordu dame, maibé iha Agostu 1983, militár Indonézia halo masakre iha Krarás, ne’ebé akordu dame la hetan solusaun. Iha fulan Setembru deklara estadu emerjénsia no militár Indonézia hahú operasaun foun ida – Operasaun Dasa.

Iha tinan hanesan (1982), Taur Matan Ruak transfere ba Komandu Operasionál Oeste (rejiaun oeste tomak, área Baucau/Viqueque) no sai konselleiru militár no sub-xefe ba Estadu-Maiór FALINTIL nian.

Hahú husi 1986, Taur Matan Ruak kaer responsabilidade ba operasaun militár hotu-hotu iha Timor-Leste.

Iha Novembru 1992, Komandante-em-Xefe Xanana Gusmão kapturadu iha Dili. Taur Matan Ruak hetan promosaun ba Xefe Estadu-Maiór, enkuantu Xanana Gusmão kaer nafatin knaar Komandante-em-Xefe FALINTIL nian maski iha prizaun Jakarta hela.

Taur Matan Ruak sai Vise-Komandante-em-Xefe FALINTIL tomak hafoin Komandante Konis Santana mate iha 11 Marsu, 1998.

Iha Jullu 1999, FALINTIL nia akantonamentu haat de’it. Taur Matan Ruak mak responsabiliza atu evita gerrilleiru FALINTIL tiru hasoru forsa Indonézia no pro-indonézia.

Iha 30 Agostu 1999, Nasoins Unidas hala’o referendu ida iha Timor-Leste no maioria hili ba ukun rasik an.

Tuir kedas referendu ne’e, militár Indonézia sira halo violénsia maka’as ne’ebé konsege para husi Forsa Internasionál ne’ebé hetan aprovasaun husi ONU hodi tama mai Timór. Períodu ida-ne’e sai hanesan teste ba FALINTIL nia dixiplina tanba obriga sira nonook hela enkuantu populasaun husu protesaun hasoru violénsia forsa Indonézia sira nian.

Iha 10 Dezembru, Asembleia Repúblika Portugal fó Prémiu Direitus Umanus ba Taur Matan Ruak iha Lisboa. Iha 20 Agostu, 2000, Kay Rala Xanana Gusmão rezigna hosi FALINTIL no Taur Matan Ruak simu kargu nu’udar Komandante-em-Xefe FALINTIL nian.

Iha 1 Fevereiru, 2001, Taur Matan Ruak asume Komandu FDTL nian, Forsa Defeza Timor-Leste, ho patente Brigadeiru-Jenerál durante serimónia ida ne’ebé prezide husi saudozu Dr. Sérgio Vieira de Melo, Administradór Tranzitóriu ONU nian.

Ho Restaurasaun Independénsia iha 20 Maiu, 2002, Taur Matan Ruak sai nu’udar Xefe Estadu-Maiór Jenerál ba F-FDTL, FALINTIL–Forsas Defeza Timor-Leste. Iha 7 Dezembru 2006 Prezidente Ramos-Horta kondekora Taur Matan Ruak ho Ordem da Guerrilha.

Iha 2007 Prezidente Ramos-Horta kondekora tan Taur Matan Ruak ba servisus prestadus durante Operasaun Halibur, operasaun neebé F-FDTL halao hamutuk ho PNTL hodi estabelese fali seguransa no orden iha ita rain hafoin konflitu polítiku 2006 nian. Iha 28 Novembru, 2009, Prezidente Ramos-Horta promove Taur Matan Ruak ba Majór-Jenerál.

Iha Serimónia Omenajen Nasionál Agradesimentu no Rekoñesementu ba eis-kombatentes ba luta libertasaun nian iha 20 Agostu, 2011, Taur Matan Ruak dezmobilizadu hosi FALINTIL no kondekoradu hamutuk ho eis-kombatentes 235 seluk.

Depois nia hatama pedidu ba ezonerasaun hosi ninia kargu, iha 6 Outubru, 2011 Taur Matan Ruak hato’o ninia diskursu ba dahikus nu’udar Xefe Estadu-Maiór Jenerál F-FDTL nian durante serimónia pasajen testemuñu komandu Forsa Defeza sira.

Iha 23 Abríl, 2012, Tribunál Rekursu Timor-Leste nian proklama Taur Matan Ruak nu’udar Prezidente Eleitu, hafoin manan liu-husi eleisaun demokrátika iha loron 16 Abríl 2012.

Taur Matan Ruak simu posse nu’udar Prezidente Repúblika  ba períodu 2012-2017 iha 20 Maiu, 2012. Prezidente Taur Matan Ruak kaben ho Dr.ª Isabel da Costa Ferreira, jurista ida ne’ebé serbisu iha área direitus umanus hamutuk ho Primeiru-Ministru husi I Governu Konstitusionál, nia mós Vise-Ministra Justisa no membru CVA. Oras-ne’e, nia kaer nafatin serbisu nu’udar Asesora ba Sekretáriu Estadu Seguransa no Komisária ba Komisaun Funsaun Públika.

Sira iha oan-feto rua, Lola no Tamarisa, no oan-mane ida, Quesadhip. Prezidente  Taur Matan Ruak bele  koalia lian tolu Timor-Leste nian (Tétum, Noeti, Makassae), portugés no inglés.

Ba knaar Primeiru Ministru ba períodu 2018-2023, Taur Matan Ruak simu pose hosi Prezidente Repúblika Francisco Guterres Lú Olo, iha loron 22 Jullu 2018.

Jornalista : Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here