Ministru Defeza (MD), Filomeno Paixão, bainhira hasoru Xefe Estadu iha Palásiu Prezidente, Bairru Pité. Foto mídia PR

DILI (TATOLI)—Ministru Defeza, Filomeno da Paixão de Jesus, informa ba Prezidente Repúblika (PR), Francisco Guterres Lú Olo, kona-ba elaborasaun orsamentu jerál Estadu (OJE) 2019 nian atu tau-matan ba dezenvolvimentu Forsa Armada ho Polísia Nasionál Timor-Leste (PNTL).

Tuir nia katak iha Forsa Armada nian fó atensaun espesiál ba seguransa iha Tasi Timor relasiona ho investimentu ne’ebé sei hala’o iha kosta súl, nune’e investimentu sira ne’e bele seguru hodi bele atinji benefísiu ekonómikamente ba nasaun.

Iha parte PNTL nian, Filomeno informa, sei foku liu ba kontrolu tránzitu no Polísia Komunitária. “Ita fó énfase ba fatin rua ne’e tanba kapitál Dili tenke kontroladu. Dili labele sai fatin ba violénsia. Tinan ida ka rua Dili tenke moos hosi violénsia,” nia dehan ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin hala’o enkontru ho Xefe Estadu Lú Olo.

Nia afirma katak Dili tenke sai fatin órden no sai ezemplu ida nune’e bele hatutan mós ba iha munisípiu sira seluk.

“Ha’u informa ona ba Prezidente Repúblika katak ha’u hasai ona diretivas no forma ona komisaun tantu iha Forsa Armada no PNTL para depois revé lei ka regulamentu sira atu apoiu ba parte operasionál no tátika ba asuntu sira ne’ebé temi iha leten,” governante ne’e tenik.

Aleinde ne’e, eis Vise Xefe Estadu Maior Jenerál ne’e mós ko’alia ho Xefe Estadu atu muda mós estatutu liu-liu kona-ba pedidu Prezidente Repúblika katak Konsellu Estratéjiku Militár tenke konstituidu hosi veteranu.

“Ha’u fó ezemplu hanesan Jenerál Lere ho veteranu sira seluk ne’ebé aban bainrua ba pensaun karik, sira hela iha Konsellu Veteranu para depois bele fó hanoin ka konsellu ba iha komandu F-FDTL ne’ebé iha tranzisaun nia laran,” nia esklarese.

Iha PNTL, nia hatutan, hanoin mós atu kria estatutu kona-ba kareira hosi soldadu to’o leten ne’e bainhira maka ba rezerva no bainhira maka ba reforma nomós ho idade saida maka bele okupa kargu superintendente to’o komisáriu.

“Ida ne’e hotu iha hela faze estudu no iha tinan ida ne’e nia rohan ha’u tenke halo esforsu teb-tebes para bele entrega ba Konsellu Ministru atu aprova depois lori ba Parlamentu Nasionál atu deskuti,” Filomeno haklaken.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here