Sekretáriu Estadu Komunikasaun Sosiál, Merício Juvenal dos Reis Akara. Imajen Egas Cristovão

DILI, (TATOLI) – Governu liuhosi Sekretáriu Estadu Komunikasaun Sosiál (SEKOMS), Mericio Juvenal dos Reis Akara, dehan sidadaun ne’ebé mak di’ak tenke uza mídia sosiál ho loloos, la’os tolok ema, defama, insulta ho karatér ne’ebé la ho étika.

“Governu iha responsabilidade atu garante responsabilidade sidadaun nian hodi dezenvolve karatér sidadaun ne’ebé di’ak atu labele uza mídia sosiál hodi fó informasaun ne’ebé la edukativu”, Akara ba jornalista sira iha Parlamentu Nasionál, ohin.

Ho espíritu ne’e mak governu hakarak iha matadalan ruma atu sidadaun bele la’o tuir, liuhosi lei hirak ne’ebé presiza atu estabelese atu sidadaun bele uza responsabilidade ba Nasaun ne’e ho di’ak.

“Se hanoin nia nasaun tenke ho karatér di’ak no tenke iha responsabilidade ba nasaun, nune’e mak governu presiza estabelese lei atu bele regulariza ema hotu”, tenik.

Nune’e lei ne’ebé governu dadaun atu fó atensaun mak lei radio difuzaun, lei tranzasaun elektrónika no lei Cyber Crime.

“Presiza estabelese lei hirak ne’e atu regula frekuénsia sira  ne’ebé mídia sira uza no tenke kolabora ho Autoridade Nasionál Komunikasaun, nune’e mós lei tranzasaun elektrónika inklui lei Cyber Crime atu nune’e bele orienta sidadaun ho di’ak ka edukativu”, katak.

Iha kontestu utilizasaun mídia sosiál ho intensaun negativu, governante ne’e dehan hanoin ona estratéjia ida bolu dehan promove internet saudavél, signifika ema tenke hatene uza mídia sosiál ne’ebé ho pozitivu no negativu no tenke hatene informasaun falsu.

“Ita hakarak kolabora ho Ministériu Edukasaun ho instituisaun sira seluk atu hahú lansa programa ka ita bolu promove internet saudavél katak tenke hatene buat ne’ebé pozitivu no negativu”, sujere.

Governante ne’e akresenta atu buka ema uza ID falsu ka uza facebook ne’e la fasíl, tanba ne’e mak presiza kria lei uluk hafoin halo kooperasaun ho parte hotu mak Polísia Sientífika Investigasaun Kriminál, Autoridade Nasionál Komunikasaun, Operadór Telekomunikasaun hotu iha Timor-Leste atu identifika ema ne’ebé konsidera deskoñesidu ho uza mídia sosiál.

Entretantu, iha mundu globalizasaun ho teknolójiku, nasaun barak mak preokupa atu kontrola mídia sosiál, atu ema uza meiu ne’e ho forma pensamentu pozitivu liuhosi peskiza sientífiku atu dezevolve karatér sidadaun nian ho di’ak, la’os atu uza ho pensamentu negativu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here