Prezidente Kámara Komérsiu Indústria Timor-Leste (CCI-TL), Oscar Lima, ho nia estrutura dadalia ho jornalista sira iha Palásiu Prezidene Nicolau Lobato, Bairru Pité, foin lalais. Imajen Mídia Palásiu PR.

DILI (TATOLI)—Komisaun Organizadora Terseiru Kongresu Nasionál Kámara Komérsiu Indústria Timor-Leste (CCITL-sigla portugés), konvida Prezidente Repúblika, Francisco Guterres Lú Olo, atu loke kongresu CCITL periodu 2018-2022 ne’ebé sei hala’o iha 11-12 Outubru 2018.

Atuál Prezidente CCITL, Oscar Lima, hamutuk ho Komisaun Organizadora diretamente konvida Xefe Estadu iha Palásiu Prezidente Nicolau Lobato, Bairru Pité, tersa ne’e.

Oscar Lima haktuir, durante ninia mandatu, CCITL simu subvensaun dala ida de’it hosi Governu ho montante mil $80 hodi apoiu ba formasaun ba emprezáriu nasionál sira.

“Buat ne’ebé maka ami halo iha ami nia mandatu maka prinsipalmente foka liu ba formasaun emprezáriu sira nian no buka maneira oinsá atu defende emprezáriu sira para bele hetan fasilidade hosi instituisaun finanseira,” nia esplika.

Bainhira ko’alia kona-ba instituisaun finanseira, tuir nia, la’ós fásil tanba ida ne’e liga ho banku sira, tan ne’e, dalaruma atravesa problema sira ne’ebé mosu ba iha setór privadu, maibé sira tenta nafatin atu fó kontribuisaun oinsá maka populariza CCITL.

Oscar afirma katak subvensaun labele kontinua tanba Timor-Leste hasoru impase polítika no agora emprezáriu nasionál sira maka sustenta hela CCITL.

Entretantu, Prezidente Repúblika seidauk responde ba ninia disponibilidade atu loke kongresu tanba sei apár hela ho ajenda sira seluk.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here