Lia-nain, ohin simu negosiadór prinsipál ketan tasi, Kay Rala Xanana Gusmão, hafoin fila hosi asina akordu sosa asaun 30 porsentu hosi kompañia Conocophilips ba esplorasaun kampu mina greater sunrise iha área tasi timor. Imajen António Goncalves

DILI, (TATOLI) – Xefe Negosiadór Prinsipál Ketan Tasi entre Timor-Leste ho Austrália, Xanana Gusmão, husu konfiansa ba sosiedade tomak ba prosesu lori kadoras mina no gás mai.

ʺIta presiza konfiansa ba malu, tanba ita nia sosiadade lakon ona konfiansa ba maluʺ, hateten lider nasionál ne’e iha konferénsia imprensa hafoin fila hosi rai liur iha sede  partidu CNRT, Bairru Grilos, ohin.

Populasaun kapitál, ohin simu negosiadór prinsipál ketan tasi, Kay Rala Xanana Gusmão, hafoin fila hosi asina akordu sosa asaun 30 porsentu hosi kompañia Conocophilips ba esplorasaun kampu mina greater sunrise iha área tasi timor. Imajen António Goncalves

Eis-Prezidente Repúblika ne’e hatutan TL konsege sosa ona asaun hosi kompañia ConocoPhillips ho porsentu 30, totál orsamentu milliaun $350.

Ba interese nasionál, Xanana Gusmão husu ba partidu polítiku hotu atu tau interese nasionál boot liu duke interese partidu ka grupu.

ʺPartidu hotu, ne’ebé de’it iha mundu, prinsípiu ida boot liu interese Nasaun nian tau iha leten no partidu nia interese tau iha okosʺ, afirma.

Maske hanoin la hanesan iha polítika maibé tenke tane aas interese povu no Nasaun tanba ne’e presiza unidade hodi konkretiza mehi lori kadoras mai rai laran.

Eis-Xefe Ezekutivu ne’e hatutan progresu ne’ebé hetan ba povu no jerasaun foun sira nia futuru.

“Autoridade Nasionál Petróliu sira sei haree nafatin, tanba iha buat barak sei komplikadu, sei hadi’a kontratu sira uluk ne’e para depois hasai desizaunʺ, akresenta.

Nia hatutan tan: “Ida ne’ebé maka lakohi liu (ConocoPhillips) ita atu lori kadores mai maka aseita ona, ita agradese tebes sira nia komprensaunʺ.

Ho rezultadu ne’e, kompañia ConocoPhillips husu Estadu atu aproveita, konkretiza mehi dada kadoras.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here