Fatin lixu iha entrada ba Kristu Rei. Imajen espesiál

DILI, (TATOLI)-Administradór Sentru Informasaun Turístika (SIT) Ministériu Turizmu, Komérsiu no Indústria (MTKI), António da Silva, hatete SIT simu sujestaun husi visitor estranjeiru sira bainhira vizita Timor-Leste liuliu kona-ba lixu iha kapitál.

“Sira dehan nasaun ne’e bonita, kapa ‘ás, sidade ne’e kalma, movimentu ladún barak, mas lixu ne’e maka sira haree no sira komprende katak ne’e la’ós iha Timór de’it, iha Bali mós hanesan no iha Lombok agora lixu mós komesa maka’as no sira sujere para atu hadi’a imajen ne’e di’ak, lixu ne’e maka tenke hamoos”, António afirma iha Lesidere, ohin.

Aleinde ne’e sujere mós sobre fasilidade públiku hanesan sintina, transporte públiku sira ne’e nomós kualidade servisu liuliu iha munisípiu sira.

“Sira sujere para na’in ba guest house (uma ba bainaka), restaurante sira ne’e mínimu iha komunikasaun bázika para bele fasilita sira”.

António akresenta problema lixu ne’e kontinua akontese tanba iha kestaun tolu mak hanesan konsiénsia ema nian, infraestrutura no regulamentu sira.

“Tanba tolu ne’e kait ba malu, ita bele iha infraestrutura di’ak, mas ema nia konxiénsia laiha nafatin. Agora, ita bele iha infraestrutura di’ak, ema nia konxiénsia iha kuandu ita lá reforsa ho regulamentu sira dala ruma ne’e ladún forte para ita atu regula”.

Administradór ne’e relata bainhira ko’alia ho funsionáriu husi munisipál Dili nia kona-ba regulamentu ba utilizasaun domíniu públiku liuliu sobre jestaun lixu iha tiha ona, maibé sei iha problema kona-ba standard operating procedure (SOP) maski iha tiha ona regulamentu, mas atu aplika maka padraun seidauk iha.

“Ministériu Turizmu nia papél kona-ba promosaun no destinasaun hakarak tebes serbisu hamutuk ho sira no durante ne’e la’o no halo komunikasaun ho sira. Espera katak tempu badak sira iha asaun ba ida ne’e”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here