Uma Fukun Parlamentu Nasionál. Imajen/Espesiál

DILI, (TATOLI) – Deputadu Alexandrino Costa da Cruz husi bankada Frente Revolusionária Timor-Leste Independente (FRETILIN) iha plenária segunda ne’e husu ba parte ezekutivu atu haree dalan alternativu ba komunidade suku Matai, sub-distritu Maucatar, munisípiu Kovalima, bainhira hakat auto-estrada.

“Ha’u sente triste tebes bainhira fim semana kuandu ha’u ba munisípiu, liu auto-estrada ha’u haree ferik no katuas sira lori sira nia oan, bote, ai-maran, hodi liu redi ne’ebé kompañia dada ona hodi hakat dalan ne’e”, tenik.

Tuir nia kuandu kestaun ne’e la rezolve, futuru sei sai dezastre boot, tanba movimentu kareta sei barak no bele mós kria problema ba populasaun mak tenta hakat auto-estrada ne’e, liu-liu iha suku Matai em jerál nomós iha suku Labarat, sub disktritu Suai, parte balun hanesan aldeia Oldelis ne’ebé mak sira nia rate balun iha auto-estrada sorin.

“Tempu besik ona loron matebian, ema barak komesa hanoin hadi’a matebian sira nia rate maibé susar bainhira sira atu halo konstrusaun ba rate tenke lalin rai henek maizumenus kilometru rua husi estrada sorin hodi hakur ba estrada sorin, ne’e dalan laiha”, dehan tan.

Nia hatutan bainhira nia parte ko’alia ho xefe suku Matai, autoridade ne’e dehan ko’alia ona ho kompañia responsavel ba auto-estrada, China Oversies Engineering Group Co,Ltd (COVEC-CRFG) no kompañia ne’e hatete prontu atu loke dalan maibé hein desizaun husi governu, maibé to’o agora seidauk iha rezultadu kona-ba kestaun ne’e.

“Ami rona mós iha tempu badak atu halo ona inagurasaun ba auto-estrada ne’e, tanba ne’e husu ba ministru bele fó hanoin ba ministériu kompetente atu haree”, katak.

Biban hanesan, deputadu Adriano do Nascimento husi bankada Partidu Demokrátiku mós hato’o kestaun hanesan.

Nune’e nia husu bainhira halo planu ba orsamentu 2019, bele inklui kestaun ne’e, tanba ne’e kestaun ne’ebé komunidade sira sempre preukupa.

“Se-bele ita planu orsamentu tinan 2019 ne’e tetu ba para bele fó asesu komunidade ba rate, to’os no natar, animal sira para komunidade bele iha dalan atu liu”, dehan.

Hatan ba kestaun ne’e, Ministru Reforma Lejislativa no Asuntu Parlamentár, Fidelis Leite Magalhães, hateten oinsá fasilita komunidade sira hakur estrada husi sorin ba sorin, husi nia parte informa ona ba ministériu obras públikas no orgaun kompetente seluk hetan ona resposta no kestaun ne’e hato’o ona iha plenária Parlamentu Nasionál (PN) antes ne’e.

“Ami informa ona governu nia inisiativa atu fasilita komunidade, maibé kestaun ne’e ami rejista fali atu fó hatene dala ida tan ba ministériu relevante”, tenik.

Entretantu iha plenária antes ne’e ministru Fidelis informa ona bainhira hatan ba preokupasaun deputadu sira kona-ba kestaun pedestre (la’o ain) iha auto-estrada, nia dehan parte governu iha planu atu harii ponte ka túnel.

“Preokupasaun ba auto-estrada ne’ebé mak difikulta asesu populasaun ba to’os. Governu iha planu harii ponte ka túnel rua no ninia detallas téknika sei fornese tuir mai, maibé ida ne’e sira toma nota no halo ona levantamentu”, katak.

Hodi dehan informasaun ne’e to’o ona iha ministériu obras públikas, tanba  ne’e sira haruka ona ekipa hodi haree.

Entretantu projetu auto-estrada husi Suai to’o Beaço, Vikeke tuir dezeñu ninia naruk 30.355 kilómetru no luan 25 metru ho konstrusaun sei halo iha faze haat.

Faze dahuluk hosi Suai ba Fatukai, faze daruak hosi Fatukai ba Betano, faze datoluk hosi Betano ba Natarbora no faze ikus hosi Natarbora ba Beaço.

Kustu ba konstrusaun no supervizaun husi tinan 2012 to’o 2017 hamutuk milliaun $535, la inklui kustu estudu viabilidade (feasibility study), estudu detalladu tékniku (detail engineering design), no indemunizasaun ba rai.

Responsavel ba projetu ne’e China Oversies Engineering Group Co,Ltd (COVEC-CRFG) rasik iha loron 20 agostu foin lais ne’e hasoru ona Primeiru-Ministru (PM), Taur Matan Ruak, hodi ko’alia kona-ba projetu auto-estrada Suai liga Beaço ba faze dahuluk hamutuk 34 kilómetru sei inaugura iha tempu besik.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here