Prezidente Tribunál Rekursu, Deolindo dos Santos. Imajen Egas Cristovão

DILI (TATOLI)—Prezidente Tribunál Rekursu, Deolindo dos Santos, hala’o enkontru ho Prezidente Repúblika, Francisco Guterres Lú Olo, hodi ko’alia kona-ba eventu Asembleia Jerál Prezidente sira hosi Tribunál Kontas Nasaun Ko’alia Lian Portugés (CPLP-sigla portugés) nian ne’ebé hala’o durante semana ida nia laran iha Dili, semana kotuk.

Nia dehan benefísiu ne’ebé hetan hosi asembleia ne’e boot tebes tanba nasaun barak hakarak mai halo kooperasaun ho Tribunál Kontas Timor-Leste (TL) tanba TL nasaun foun.

“Ba Kámara Kontas Timor-Leste nian hetan benefísiu boot tanba ita tama ba iha organizasaun ne’e (Kámara Kontas CPLP) iha 2013 liu-ba no ita sei husu apoiu para bele fó kapasitasaun ba ita nia juiz ho tékniku sira iha Kámara Kontas ne’e rasik,” Deolindo ba jornalista sira iha Palásiu Prezidente Nicolau Lobato, Bairru Pité, segunda ne’e, hafoin hala’o enkontru ho Xefe Estadu Lú Olo.

Tulun hosi organizasaun Kámara Kontas CPLP, nia esplika, bele produs kuadru formadu ba Tribunál Fiskál Kontas tuir konstituisaun hateten.

“Bainhira ko’alia kona-ba auditoria, buat ne’ebé maka espesífiku teb-tebes katak presiza koñesimentu ne’ebé di’ak iha área ida ne’e,” Deolindo informa.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here