Sentru Informasaun Turístika iha Lesidere. Foto/MT.

DILI, (TATOLI)-Sentru Informasaun Turístika (SIT) Ministériu Turizmu, Komérsiu no Indústria (MTKI) iha estratéjia rua halo promosaun Timor-Leste bá rai-li’ur mak liuhusi offline no online.

Administradór SIT, António da Silva esplika offline mak ita halo bosura ki’ikoan sira ne’e, ida fali online iha website http://www.timorleste.tl/ ne’ebé iha ne’ebá iha detallu kompletu.

“Iha ne’ebá mós ita iha janela ida hanesan parte ida ita tau para iha sujestaun ba atividade durante sira (turista) iha Timór”, António katak iha Lesidere, ohin.

Entantu sujestaun ne’ebé vizitór husik hela maka kona-ba konetividade iha rai-laran nomós rai-liur nian. “Konetividade husi li’ur ita hatene durante ne’e aviaun husi Indonézia maka barak, mas ita-nia merkadu ne’e Austrália tiha”.

Aleinde ne’e sobre transporte rai-laran nian mós sai kestaun ba turista sira ne’ebé la’o mesak bainhira hakarak atu bá fatin ida, ezemplu atu bá Jako (Lautein). Turista sira husu informasaun sobre transporte lokál no SIT informa tiha atu sa’e bis husi Dili bá Lautein, bainhira to’o atu bá fali Jako difisil tanba meiu atu lori vizitór ne’e maka laiha.

Tanba ne’e rekomendasaun ne’ebé bainaka li’ur sira husik hela iha SIT rekolla no informa ba superiór sira atubele hatene no iha tempu oin mai sei hadi’a website ne’e oinsá atu hatama informasaun detalla kona-ba produtu, fasilidade, konetividade munisípiu sira-nian.

Nia hatutan dezde SIT ne’e harii iha 12 marsu 2018 to’o agora iha ona vizitante estranjeiru 350 maka vizita fatin ne’e hodi husu informasaun sobre turizmu Timor-Leste nian.

“Barak liu mai iha ne’e kuaze fim de semana, sira ne’ebé maka hakarak bá Ataúru tanba informasaun barak sira labele hetan iha online, hanesan akomodasaun bázika sira ne’e, ita-nia maluk sira iha Atáuru laiha website entaun ministériu iha dadus ida ne’ebé koleta akomodasaun sira ne’ebé iha, ita halo tiha hanesan brosura simples ida depois fó sira mak buka hatene rasik”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here