Diretór Jerál Finansa Estadu Ministériu Finansa (MF), Januario da Gama, bainhira ko’alia iha panorama orsamentál 2019 iha MF Aitarak Laran. Imajen Egas Cristovão

DILI, (TATOLI) – Diretór Jerál Finansa Estadu Ministériu Finansas (MF), Januário da Gama, hatete ministériu no instituisaun Estadu sira tenke  submete sira-nia proposta Orsamentu Jerál Estadu (OJE) 2019 ba MF iha 12 outubru.

Diretór Jerál ne’e dehan kalendáriu ba preparasaun Orsamentu Jerál Estadu (OJE) 2019 iha situasaun ida apertadu, tanba tinan ne’e prepara orsamentu rua mak OJE 2018 no tinan oin nian.

“Kalendáriu ne’ebé ita iha to’o semana oin 12 outubru, ministériu no instituisaun sira tenke submete ona sira-nia proposta orsamentu 2019 mai Ministériu Finansa. Pur tantu prosesu tékniku la’o hela iha instituisaun sira, ida-idak prepara programa, atividade no oinsá bele halo alokasaun ba orsamentu tuir tetu ka pakote ne’ebé distribui ona”, Januário afirma iha Aitarak-Laran, ohin.

Daudaun ne’e MF seidauk haree difikuldade ruma husi instituisaun sira kona-ba dezafiu ou komplesidade balun ne’ebé hetan.

“Preparasaun ne’e iha prátika normál ida ne’ebé sira iha ona koñesimentu, referénsia no Ministériu Finansa, fiar katak to’o semana oin sira sei kumpre deadline (data ikus), depois ita bele kumpri mós deadline ba kalendáriu ne’ebé determina ona husi Konsellu Ministru atubele aprezenta iha Parlamentu Nasionál”.

Kalendáriu ne’ebé KM aprova, proposta orsamentu sei submete ba Parlamentu Nasionál iha 8 novembru, signifika husi distribuisaun tetu dezagredadu mai ministériu sira tenke halo ezersísiu para kumpre submisaun proposta mai MF no hamutuk ho Unidade Planeamentu no Monitorizasaun no Avaliasaun (UPMA) halo análiza ida hodi prepara rekomendasaun mai Komité Revizaun Orsamentál Polítika.

“Komité Revizaun Orsamentu sei konvoka nia reuniaun entre 22 to’o 28 outubru para bele halo apresiasaun ba sira-nia proposta, liuliu ba pograma no orsamentu atu haree enkuadramentu entre orsamentu no programa depois bele iha nia rasionalizasaun ida ba planu no alokasaun”.

Iha 25 setembru ne’e MF distribui tetu fiskál 2019 ba liña ministériu no instituisaun Estadu tuir desizaun Konsellu Ministru nian iha 21 setembru ne’ebé aprova ona tetu fiskál agregadu ho montante $1,350,000,000 ne’ebé lainklui empréstimu hodi finansia despeza Estadu.

Iha momentu fahe tetu ne’e Diretór Jerál Finansas Estadu hatete tetu ne’e dezagrega ba saláriu no vensimentu hamutuk milliaun $199.57, bens no servisu aloka milliaun $305.2 inklui Fundu Dezenvolvimentu Kapitál Umanu, transferénsia públika milliaun $622.36, kapitál menór milliaun $4, kapitál dezenvolvimentu milliaun $218.87 no iha tinan oin aloka mós montante balun ba kapitál dezenvolvimentu-empréstimu hamutuk milliaun $87.

“Husi tetu ne’ebé dezagrega iha 2019 ministériu no instituisaun sira tenke halo reflesaun ba prioridade nasionál ne’ebé diskute ona iha sesaun jornada orsamentál no aprova ona husi Konsellu Ministru”.

Prioridade nasionál ne’ebé adota iha OJE 2019 nia maka hasa’e produsaun agríkola hodi hametin seguransa ai-han no hamenus má nutrisaun, promove edukasaun no formasaun inkluziva ho kualidade no orientadu ba merkadu.

Alende ne’e hametin servisu saúde ne’ebé kualidade no inkluzivu hodi kontinua programa saúde na família, dezenvolve infraestrutura bázika ba bee-moos no saneamentu, estrada, eletresidade telekomunikasaun (fibra óptika), portu no aeroportu, hametin instituisaun ba desentralizasaun administrativa, promove dezenvolvimentu setór privadu no promove ambiente negósiu hodi haburas investimentu setór provadu.

“Husi tetu dezagregadu ne’ebé fahe ministériu, instituisaun no ajénsia autónoma sira tenke halo reflesaun ba prioridade ne’e no halo reflesaun ba planu tinan lima no Planu Estratéjiku Dezenvolvimentu Nasionál nian”, katak.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here