Prezidente Ezekutivu Ajénsia Notisiáriu Tatoli, Rosario Maia Martins, sorumutu ho Sekretáriu Estadu Komunikasaun Sosiál, Merício Juvenal dos Reis Akara, iha Palásiu Governu, sesta (5/10). Imajen Egas Cristovão

DILI, (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis Akara, ohin sorumutu ho prezidente ezekutivu indijitadu ájénsia notísia Timor-Leste-TATOLI. IP, Rosário da Graça Maia, hodi ko’alia planu toma pose no vizaun dezenvolve TATOLI. IP.

Sekretáriu Estadu Komunikasaun Sosiál, Merício Juvenal dos Reis Akara. Imajen Egas Cristovão

“Agora ba oin, oinsá reforsa serbisu ne’ebé durante ne’e la’o ona. Kooperasaun ho parseiru, konteúdu notísia no oinsa dezenvolve la’ós versaun tetun de’it maibé portugés, inglés nomós língua indonézia”, Akara ba jornalista sira iha Palásiu Governu, ohin.

Nia haktuir prezidente TATOLI.IP hato’o disponibilidade tanba iha serbisu seluk ne’ebé tenke hakotu, maibé informa katak fulan ne’e (outubru) bele hakotu nia serbisu iha fatin seluk no hahú simu posse.

“Ita iha vizaun hanesan, ha’u iha konfiansa ba nia, politikamente. Katak nia sei serbisu profisionál, sei dezenvolve TATOLI di’ak liu, sei reforsa, sei halo kolaborasaun di’ak, internál no externál. Pesoalmente, ha’u hakarak fó parabéns ba nia tanba nia disponível kontribui”, afirma.

Prezidente Ezekutivu Ajénsia Notisiáriu Tatoli, Rosario Maia Martins. Imajen Egas Cristovão

Iha fatin hanesan, Prezidente indijitadu, Rosário Maia, haktuir kestaun ne’ebé sira ko’alia mak aspetu operasionál mak barak liu no rona prioridade governu nian ne’ebé mak envolve iha setór komunikasaun sosiál, atu hahú hakat ba oin.

“Ha’u-nia hanoin kestaun operasionál, kestaun ba jestaun atu hahú TATOLI”, katak.

Kona-ba data simu posse, nia haktuir sei hahú iha tempu badak. “Iha fulan ida ne’e nia laran, bele iha ona data ba tomada de posse, liuliu funsionamentu TATOLI”, haktuir.

Rosário da Graça Maia nomeia husi Konsellu-ministru, tersa (11/7) iha 2017 liuhusi rezolusaun governu ne’ebé aprezenta husi SEKOMS iha sestu governu konstitusionál, tanba konsidera no rekoñese mós kapasidade téknika, jestaun, esperiénsia, senioridade no imparsialidade.

Jornalista: Rafy Belo

Editora: Rita Almeida

Notísia no video relevante; http://www.tatoli.tl/2017/07/km-nomeia-rosario-maia-lidera-agensia-tatoli/

https://www.youtube.com/watch?v=-BNwtZxvKNI&feature=youtu.be

HAKEREK NO HATÁN

Please enter your comment!
Please enter your name here