Eis Prezidente Repúblika, José Ramos Horta

DÍLI, (TATOLI)-Premiadu Nobel da Paz, José Ramos Horta hateten katak tau atensaun ba profesór sira, hahú husi nível pré-primáriu to’o ensinu superiór sira no kuidadu ba empregadu ka pesoál saúde sira hanesan doutór, enfermeiru, parteira no seluk tan to’o limpejadór sira iha ospitál ho laran luak no apoiu, nasaun no sosiedade sei sai forte.

“La iha nasaun ida, la iha sosiedade ida ne’ebé mak sei forte se la iha pilár boot rua ne’e (edukasaun no saúde),” dehan premiadu Nobel da Paz, José Ramos Horta, iha Kampus Sentrál-UNTL (Universidade Nasionál Timor Lorosa’e), ohin, perante estudante Fakuldade Direitu UNTL nomós akadémiku sira seluk tan iha ensinu superiór ne’e.

Eis-prezidente Repúblika ne’e akresenta, importante governu investe liutan iha edukasaun, saúde. “Profesór sira tenke dignifikadu liuhusi sira-nia estatu sira ne’ebé mak rekoñesidu husi estadu, dignifika liuhusi kondisaun materiál ne’ebé estadu fó ba sira; akontese ba iha nível hotu, nune’e mós iha setór saúde nian,” insiste lider timoroan ne’e.

Ba profesór no dosente sira iha Fakuldade Direitu, UNTL Premiadu Nobel da Paz, José Ramos Horta realsa katak sira iha dever morál boot ba ita-nia ema sira (estudante). Katak, prepara estudante sira ba futuru jurist, advogadu, prokuradór no seluk tan. Nune’e bele halo investigasaun ho totál kompeténsia; kompeténsia téknika ne’ebé mak la kestionável no izensaun totál no umanidade.

“Justisa la’ós de’it ho punisaun (kastigu). Juís kompetente mak ida ne’ebé hatene interpreta lei. Lei ne’ebé mak estuda ho didi’ak apesarde iha Parlamentu; labele halo copy paste ba lei, ne’ebé mak la adapta no realidade país ida nian. Justisa loloos mak desizaun ne’ebé afavór ba umanidade,” esplika premiadu Nobel da Paz timoroan ne’e.

Tanba ne’e, tuir eis-prezidente repúblika, José Ramos Horta, Fakuldade Direitu-UNTL ajuda forma juís, advogadu, prokuradór, ho karakter sira hanesan ne’e iha futuru, liuhusi edukasaun.

Antes ne’e, Sosiedade sívil mós ba governu atu aumenta Orsamentu Jerál Estadu (OJE) ba iha edukasaun. Prezidente organizasaun Kadalak Timor-Leste, Natalino de Jesus Dias akresenta katak governu konstitusionál da-walu presiza toma atensaun ba rekursu umanu, liuhusi aumenta OJE ba setór edukasaun tanba OJE alokadu ba Ministériu Edukasaun, antes ne’e, menus husi pursentu 20 hodi dezenvolve edukasaun.

Prezidente organizasaun Kadalak Timor-Leste , Natalino de Jesus Dias. Foto FB: Natalino de Jesus

“OJE ba edukasaun presiza aumenta tanba tuir ha’u-nia observasaun rekursu umanu ne’e baze fundamentál. Se investimentu menus afeta ba kualidade dezenvolvimentu. Tanba ne’e, tenke investe iha rekursu umanu,” dehan prezidente Kadalak, Natalino de Jesus Dias, horseik kuarta loraik (17/05), iha Becora-Díli.

Nia akresenta liutan katak ho governu ne’ebé sei mai bele garante liutan dezenvolvimentu ne’ebé ho kualidade. Dezenvolvimentu ne’ebé kualidade mai husi rekursu umanu ne’ebé kualidade.

“Ha’u hanoin katak tenke hala’o formasaun karakter ba sidadaun sira atu nune’e bele iha liutan konsiénsia nu’udar sidadaun timoroan,” dehan líder másimu organizasaun ho lema Sulimutu sai Ida ne’e.

Nia rekuñese katak oras ne’e timoroan sira mós matenek barak ona, maibé seidauk uza “Matan fuan” nian ho efetivu hodi hala’o dezenvolvimentu tanba haree liu ba kestaun lukru, nune’e afeta fila fali ba dezenvolvimentu rasik.

Prezidente Kadalak Timor, Natalino de Jesus afirma katak ita iha no hala’o ona Planu Estratéjiku Dezenvolvimentu Nasionál (PEDN), maibé presiza iha buat balun ne’ebé ita presiza hadi’a, liliu oinsá atu hasa’e kualidade rekursu umanu kada ministériu para nune’e atu bele másimiza dezenvolvimentu ne’ebé la’o, hodi lais liutan.

Sidadaun sira ne’ebé sei sai governante iha governu da-walu, fó kontribuisaun ka serbisu la’ós tanba atu manan osan, maibé oinsa bele konsensializa. Atu dezenvolve, konstrui no trata dezenvolvimentu Timor-Leste la’ós de’it ba tinan rua ka tolu maibé garante kualidade ba tinan lima, sanulu ka liu iha área hotu.

“Tanba ne’e ema sira ne’ebé mai atu governa da-walu tenke toma atensaun ba rekursu umanu dezenvolvimentu ida di’ak liu,” konklui prezidente Kadalak, Natalino de Jesus Dias.

Organizasaun Kadalak Timor-Leste ho lema Sai Ida Sulimutuk nu’udar organizasaun ne’ebé estabelese husi inisiativa eis-seminarista timoroan sira, iha fevereiru tinan kotuk.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here