Vise-Prezidente Parlamentu Nasionál, Maria Angelina Sarmento. Foto Egas Cristóvão

DILI, (TATOLI) – Parlamentu Nasionál (PN) iha ona hanoin atu halo kalendáriu ba debate Orsamentu Jerál Estadu (OJE) 2019 ne’ebé sei aprezenta hosi Governu Konstitusionál da-ualu.

“Governu fó ona idea mai ami atu halo kalendáriu, ajendamentu ba debate orsamentu 2019, tanba debate hahú iha meiadu fulan-novembru, entaun ami iha ona hanoin atu prepara tuir informasaun ne’ebé iha”, Vise Prezidente PN, Maria Angelina Sarmento, ba jornalista sira iha uma fukun hafoin hasoru malu ho Ministru Reforma Lejislativa no Asuntu Parlamentár, Fidelis Leite Magalães, ohin.

Maibé molok governu aprezenta OJE 2019 mai parlamentu, ezekutivu sira sei realiza workshop ida kona-ba panorama orsamentál.

Enkuantu planu atu hahú debate, temporariamente sei hahú iha fulan klaran novembru no sei termina iha dezembru.

Entretantu hafoin debate OJE 2019, orgaun lejislatura sei enkamiña hikas proposta lei OJE 2019 ba Prezidente Repúblika, Fransico Guterres Lú Olo, atu halo estudu hafoin bele promulga ka veta tuir prazu legál ne’ebe konsitituisaun permite.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here