Parlamentu Nasionál (PN), ohin realiza sesaun plenária estraordinária hodi debate Konta Jerál Estadu 2016. Imajen António Goncalves

DILI (TATOLI) – Parlamentu Nasionál (PN), liuhosi plenária estraordinária kuarta ne’e, halo diskusaun no votasaun ba Konta Jerál Estadu tinan 2016 ne’ebé Câmara de Contas Tribunal Rekursu halo ona relatóriu no pareser, nune’e rezultadu votasaun aprovadu ho unanimidade ho rezultadu afavór 55.

Ministra Finansa em ezersísiu, Sara Lobo Brites hateten VIII Governu Konstitusionál sei esforsu makas atu implementa rekomendasaun sira ne’ebé aprezenta ona ho objetivu bele hadi’a liután prosesu tomak konaba preparasaun orsamentu no ezekusaun iha tinan sira tuir mai.

“Governu komprometidu liuhosi programa sira ne’ebé mak atu implementa atu introdús no kontinua programa husi reforma oin-oin hanesan reforma fiskál no reforma iha despeza públika nu’udar medida polítika ida hodi hadi’a liután jestaun finansas públika iha ita nia rai”, tenik iha plenária.

Xefe Bankada UDT/Frente Mudansa, Gilman Exposto dos Santos fó hanoin ba governu atu tau kontrolu as ba atividade hotu ne’ebé iha relasaun ho orsamentu tanba  sosiedade sivíl no povu sempre kestiona katak estadu gasta povu nia osan.

“Rikusoin ne’e povu nian, ne’e duni ha’u hanoin katak responsabilidade boot  iha governu atu ezekuta orsamentu ho di’ak, nune’e mós tenke iha kontrolu di’ak ida husi parte hotu atu atividade sira ka projetu sira ne’ebé hala’o liu-liu iha área konstrusaun bele fó impaktu pozitivu ida ba povu hotu-hotu nia moris”, tenik.

Xefe Bankada PD, António da Conceição husu atu rekomendasaun sira ne’ebé mak fó hanesan meiu ida ne’ebé mak ajuda governu atu fortifika kapasidade governasaun no jestaun ba rekursu estadu nian.

“Ministériu Finansa hanesan ministériu ne’ebé hola responsabilidade boot  atu tulun mós ministériu seluk atu halo ezekusaun ne’ebé di’ak konaba OJE, ne’e duni rekomendasaun sira mai ho intensaun atu halo mós korresaun ba saida mak ita atu halo ba oin”, dehan.

Nune’e nia akresenta, bankada PD nafatin fó apoiu  ba Ministériu Finansa hodi bele reforsa servisu sira iha kada liña ministerial, hodi nune’e uzu rekursu ne’ebé mak alokadu ba kada ministériu bele fó nia benefísiu ba populasaun tomak, liu-liu bele lori servisu sira ba baze nian.

Xefe Bankada KHUNTO, António Maria Nobre Amaral Tilman relatóriu hateten ne’e atu hatene loloos ezekusaun orsamentu no kapasidade governu nia hodi ezekuta planu orsamentu ne’ebé PN aprova ona.

“Relatóriu ne’e deteta irregularidade barak, atus indixiplinadas iha ministériu lubuk ida, tanba  ne’e mak ami atu sujere atu VIII Governu bele konsidera rekomendasaun hato’o husi Câmara de Contas atu bele melhora jestaun ezekusaun orsamentu liu-liu iha 2018 ne’ebé hela fulan rua efetivu atu halo ezekusaun.

Nia hatutan, “Ami preokupa tebes ho kapasidade ezekusaun ho tempu ne’ebé limitadu tanba  ne’e rekomenda ba futuru bele konsidera rekomendasaun atu melhora ezekusaun ne’e di’ak liu iha futuru, tanba  se lae polítika governu nia atu halakon despeza supérfluu ne’e sei la atinje”.

Vise Xefe Bankada PLP, Francisco de Vasconcelos hateten debate ohin tuir enkuadramentu legal kompete ba Tribunal Superior Administrativa Fiskál Kontas nu’udar únika instituisaun ne’ebé iha kompeténsia eskluzivu hodi halo fiskalizasaun ba legalidade ba despeza públika no julgamentu ba Konta Jerál Estadu.

“Iha relatóriu pareser Konta Jerál Estadu husi Tribunal Câmara de Contas nian ho finalidade aprezenta 47 rekomendasaun konaba ezekusaun no defisiénsia balun konaba transferénsia, kapasidade órgaun autónomu sira hodi halo kobransa taxa mosu irregularidade barak, mézmu ita adopta norma internasionál no kontabilidadade aplikavel iha setór públiku sira”, tenik.

Tuir nia, situasaun sira ne’e bolu atensaun ba PN hodi bele hala’o ezersísiu fiskalizasaun kontrolu polítiku ba atividade hotu-hotu ne’ebé uza orsamentu estadu, ezemplu ki’ik iha rekomendasaun husi Câmara de Contas nian mak deskreve kontrolu konaba kobransa no rejistu reseita husi entidade kompetente sira, maibé sira uza de’it   la halo transferénsia ba banku sira ne’ebé define ona, iha ne’ebá iha órgaun autónomu balun.

Xefe Bankada CNRT, Duarte Nunes hateten Bankada CNRT hato’o apresiasaun polítika konaba aprezentasaun Konta Jerál do Estadu 2016 mai iha plenária hodi kumpre regras Konstitusionál, katak órgaun kompetente hanesan PN hala’o apresiasaun nu’udar órgaun fiskalizador atu fiskaliza oinsá estadu hala’o OJE tuir planu no programa ne’ebé governu mai aprezenta.

Nia konsidera paraser Komisaun C Finansa Públika ne’ebé Relatór sira ohin aprezenta iha plenária ne’e, hatudu katak prenxe ona rekizitu konstituisionais, nu’udar  regra iha estadu demokrátiku atu deputadu/a sira fó apresiasaun polítika ba paraser Câmara de Contas ba despeza Orsamentu Jerál Estadu 2016.

“Bankada CNRT husu ba VIII Governu Konstitusionál, liuhosi Primeiru-Ministru atu fó atensaun ba rekomendasaun hosi Câmara de Contas nian, liu-liu entidade no instituisaun estadu sira ne’ebé mensiona iha paraser ida ne’e hodi kumprimenta leis no sistema aprovizionamentu, tuir normas no prinsípiu Boas Praticas, atu nune’e ita bele hadi’ak di’ak liután sistema jestaun finansiamentu públiku hodi garante sustentabilidade finanseiru no haboot ninia benefísiu ba povu tomak nia moris di’ak”, katak.

Xefe Bankada Fretilín, Aniceto Guterres hateten husi Konta Jerál Estadu ne’e deteta ona katak sei iha frajilidade no irregularidade iha mákina administrativu estadu nian no jestaun ba orsamentu públiku.

“Situasaun jestaun finanseira to’o tinan 2016 nafatin laiha mudansa tanba  governu anterior sira ignora ka laiha seriedade atu halo tuir rekomendasaun husi Câmara de Contas Tribunal Rekursu nian nu’udar órgaun ne’ebé julga Konta Jerál Estadu, rekomendasaun barak mak governu la konsege implementa. Husi 52 rekomendasaun ba Konta Jerál Estadu 2015 nian, durante 2016 rekomendasaun 5 de’it   mak implementa husi parte governu”, nia kompara.

Hodi dehan, konaba kestaun dívida naun finanseira, ohin Komisaun C  emite ona relatóriu pareser ho rekomendasaun ne’ebé Bankada Fretilín subskreve ona, no husu ba governu atu halo apuramentu definitivu dívida naun finanseira to’o tinan 2016 no husu governu atu konklui hamutuk iha proposta orsamentu ba 2019.

Iha konkluzaun ida katak Konta Jerál Estadu 2016 nakonu ho mal jestaun, mal administrasaun no krime finanseira, ita labele tolera beibeik situasaun hanesan ne’e tinan ba tinan, tanba  ne’e VIII Governu Konstitusionál maski governu foun no foin hahú knar hanesan jestór ba orsamentu públiku tenke asume responsabilidade atu hadi’a no hametin mákina administrativu no finanseiru estadu nian.

Nune’e Bankada Fretilín rekomenda ba governu ida ne’e atu halo implementasaun ho totalidade rekomendasaun husi Câmara de Contas no Komisaun C, governu tenke halo preparasaun no jestaun di’ak ba rekursu umanu iha área jestaun finanseira nu’udar asuntu ne’ebé prioridade no urjente.

Husi relatóriu no pareser Câmara de Contas ba Konta Jerál Estadu 2016, iha rekomendasaun hamutuk 47. Nune’e mós Komisaun C Finansas Públika, halo mós relatóriu no pareser.

Entretantu, valor Orsamentu Jerál Estadu (OJE) 2016 ne’ebé aprovadú hanesan Lei númeru 1/2016 14 Janeiru, hamutuk ho montante millaun $1.562,2, ne’ebé iha redusaun husi OJE 2015 ho montante millaun $1.570 (redusaun porsentu 0,5).

Liuhosi Lei númeru 10/2016 10 Agostu, aprova tan Orsamentu Ratifikativu (OR) 2016, ne’ebé altera ba millaun $1.952,9, ne’ebé reprezenta aumentu millaun $390,7 (+porsentu 25).

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here