Diretór Jerál Finansa Estadu, Januario da Gama. Foto/MF.

DILI, (TATOLI) – Ministériu Finansas (MF) ohin, ofisializa distribuisaun tetu aprovadu Orsamentu Jerál Estadu (OJE) 2018 ho montante billiaun $1.2 ba kada ministériu, serbisu fundu autónomu no instituisaun Estadu para semana oin hahú ezekuta sira-nia orsamentu.

Diretór Jerál Finansas Estadu MF, Januário da Gama, hatete haree ba períodu ezekusaun ne’ebé iha ministériu no instituisaun sira tenke halo esforsu no ezersísiu internu ida para kumpre períodu ezekusaun nian.

“Tanba kompromisu ba CPV (kompromisu fatura pagamentu) nian sei termina iha 30 novembru no pedidu pagamentu sei atende de’it to’o 20 dezembru 2018, signifika a partir ohin to’o iha kompromisu CPV nian iha de’it loron 50 resin no to’o taka pedidu pagamentu iha loron 70 resin”, katak nia iha Aitarak-Laran, ohin.

Nia akresenta: “Tempu ida apertadu tebes, nune’e iha sesaun traballu ne’e ami hasai orientasaun balun ba ministériu no instituisaun sira aleinde iha períodu hanesan sira prepara sira-nia orsamentu jerál 2019, fó konsentrasaun mós ba ezekusaun OJE 2018 para bele responde despeza no nesesidade imidiata ne’ebé tenke realiza iha OJE 2018”.

Nia hatutan despeza lubuk ida, liuliu despeza dala-ida ne’ebé tenke halo iha 2018 hanesan dívida ba kombustivel, manutensaun, pagamentu ba infraestrutura no despeza seluk ne’ebé aloka iha kada orgaun governamentál tenke fó atensaun para labele lori dívida ida ne’e ba tinan oin ne’ebé sei hatodan tan despeza iha anu fiskál tuirmai.

“Tanba ne’e orientasaun ne’ebé hatún ne’e di’ak liu ministériu sira konsentra para prioritiza halo prosesu ezekusaun ida ho kualidade, la’ós atu duni taxa ezekusaun, maibé duni kualidade ezekusaun, signifika bainhira ita iha ona kualidade ezekusaun ninia efeitu ne’e ba iha taxa ezekusaun rasik”, afirma.

Januário salienta husi análiza ba despeza ne’ebé halo média ezekusaun husi anu anteriór até agora pur volta porsentu 80 to’o 85, signifika prosesu sira tuirmai tenke implementa di’ak liután hahú husi planeamentu no orsamentasaun depois bele iha kapasidade hodi ezekuta OJE ne’e tuir alvu ne’ebé termina ona.

OJE 2018 ne’ebé aprovadu ne’e iha ona nia kabimentu orsamentu ba selú dívida sira, projetu 142 no ministériu no instituisaun liuliu iha parte Ajénsia Dezenvolvimentu Nasionál (AND) tenke halo verifikasaun, konfirmasaun ba progresu implementasaun projetu nian para depois rekomendasaun mai MF hodi halo pagamentu. Tanba ne’e iha ona kompeténsia ADN no instituisaun sira para koopera.

Vise Ministra Finansa, Sara Lobo Brites, hatete ezekusaun orsamentu ba tinan ne’e iha tempu ne’ebé badak loos no tenta serbisu hamutuk atu ezekusaun ne’e nia taxa labele sa’e maka’as iha dezembru, maibé dispersa tempu para iha ekilíbriu uitoan, tanba ne’e serbisu tenke maka’as.

Ministra mós informa bainhira halo defeza konta jerál Estadu 2016 nian iha Parlamentu Nasionál horisehik, iha rekomendasaun husi tribunál kuaze 40 resin ne’ebé maka governu komprometidu hela atu kumpre no rekomendasaun sira ne’e la’ós ba de’it MF, mas kobre entidade Estadu nian ne’ebé simu orsamentu Estadu.

“Ami haree katak se ami de’it mak halo asaun lakonsege konklui rekomendasaun husi Tribunál Konta fó, tanba liu tiha situasaun ida ita tenke aselera ezekusaun, iha situasaun normál konvida ita-boot sira atu diskute filafali rekomendasaun ne’ebé tribunál fó atu hadi’a ita-nia ezekusaun”.

Iha sesaun traballu ida ne’e MF mós disemina dekretu governu kona-ba regra no prosedimentu ezekusaun OJE 2018.

Proposta OJE 2018 promulga husi Prezidente Repúblika iha 27 setembru no públika ona iha Jornál Repúblika iha 3 outubru ne’e no iha loron hanesan Governu liuhusi reuniaun Konsellu Ministru aprova dekretu ezekusaun OJE 2018 nian.

Jornalista: Maria Auxiliadora

Editora: Rita Almeida

Lee mós :

Prezidente Repúblika Husu Governu Ezekuta OJE 2018 ho Rigór

HAKEREK NO HATÁN

Please enter your comment!
Please enter your name here