Sekretáriu Estadu Formasaun Profisonál no Empregu (SEFOPE), Julião da Silva. Foto/SEFOPE.

DILI, (TATOLI) – Sekretáriu Estadu Formasaun no Profisionál no Empregu (SEFOPE), Julião da Silva no Vise-Ministru Edukasaun (VME) Filipina, Jesus L. R. Mateo, hasoru malu hodi diskute posibilidade koperasaun iha área téniku vokasionál nian.

SEFOPE, Julião da Silva, hatete vizita kortezia VME ne’e atu hatene kle’an kona-ba situasaun ne’ebé Timor-Leste enfrenta, liuliu iha área formasaun profisionál nian.

“Agradese ba Vise-Ministru Mateo ne’ebé bele hakmaan-án mai to’o iha fatin ida ne’e atu hatene kle’an liután situasaun saida maka Timor-Leste enfrenta liuliu iha formasaun profisionál nia, kapasitasaun, oinsá atubele hasa’e abilidade no koñesimentu di’ak timoroan sira-nian no oinsá mak Timor-Leste bele aprende barak esperiénsia ne’ebé Governu Filipina iha”, katak nia iha konferénsia imprensa iha Kaikoli, kuarta ne’e.

Sekretáriu Estadu ne’e dehan Filipina nasaun ida ne’ebé halo investimentu boot iha área formasaun profisionál ba nia populasaun sira. “Espera katak vizita ida ne’e bele iha kontinuasaun ne’ebé di’ak no iha kooperasaun servisu ne’ebé di’ak liután entre Governu Timor-Leste liuhusi SEFOPE no Ministériu Edukasaun Filipina nian”.

Vise-Ministru Edukasaun Filipina, Jesus L. R. Mateo, hatete iha nia vizita ne’e halo diskusaun bilaterál ho SEFOPE no esplora diskusaun, kooperasaun iha área edukasaun tékniku vokasionál.

“Ami iha kompromisu bainhira ami fila bá Manila ami koko sei organiza enkontru seluk ho eselénsia (SEFOPE) no ekipa”.

SEFOPE hatutan enkontru ne’ebé sei organiza iha Filipina hamutuk ho tékniku SEFOPE no Ministériu Edukasaun Filipina nian ne’e oinsá atu haree área saida mak importante liu para Filipina prontu atu apoia ba Timor-leste hodi hadi’a kualidade formasaun no treinamentu ba sentru formasaun sira liuliu tékniku vokasionál.

“Area hotu importante mas depende ba Governu Filipina maka sei bele fornese. Tékniku SEFOPE sira sei identifika nesesidade merkadu ne’ebé importante liu karik haree ba peska, agrikultura, indústria, infraestrutura no ita sei haree, ita sei husu ba Governu Filipina karik sira iha posibilidade ne’ebé atu apoia ita para halo investimentu hasa’e kapasidade”.

Iha diskusaun ne’e SEFOPE aprezenta programa durante ne’e, sistema formasaun, polítika oinsá halo akreditasaun ne’ebé iha ba sentru sira no simu mós aprezentasaun balun husi Governu Filipina nian kona-ba sistema Sai mak iha no buka oinsá para kolabora hodi adapta sistema ida ne’ebé di’ak loos iha ázia pasífika.

VME Mateo haktuir mós tanba ne’e enkontru inisiál ne’ebé halo maka atu komprende diferensa sistema entre país rua ne’e no husi parte Filipina nian hato’o saida mak sistema edukasaun iha Filipina no husi ne’e koko atu esplora posibilidade kooperasaun konkreta.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here