Primeiru-Ministru, Taur Matan Ruak. Imajen António Gonçalves

DILI, (TATOLI) – Primeiru-Ministru, Taur Matan Ruak, relata prosesu sosa asaun Conocophilips ho porsentu 30 ba Prezidente Repúblika (PR), Francisco Guterres Lú Olo.

“Ha’u fó hatene ba Prezidente katak bainhira ekipa negosiál fila fali mai ho informasaun ida ne’ebé detalla, ami sei informa ba Prezidente atu kontinua akompaña prosesu ne’e tomak”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Xefe Estadu.

Taur Matan Ruak hatutan: “Tanba iha nesesidade aumenta orsamentu para selu, naturalmente sei mai iha Prezidente, entaun presiza iha informasaun detalla para bele ajuda nia halo desizaun”.

Xefe ezekutivu ne’e haktuir Prezidente Repúblika hakarak hetan informasaun di’ak liután kona-ba prosesu sosa asaun ne’e no relata iha ona akordu ida maibé sei iha tan prosesu balun ne’ebé sei la’o, tanba ne’e kuandu finál ona sei informa fali mai.

“Ami sei hein ita nia ekipa negosiadór para ami bele hatene informasaun detallu liután. Kazu nesesáriu ita tenke tau ba orsamentu Estadu para selu, se la’e ita foti osan iha ne’ebé atu selu”, nia dehan.

Nia hatutan Timor hakarak lori pipeline (kadoras) mai Timor maibé joint venture ka empreza ida Conocophilips ninia hanoin viabilidade ekonómika ka benefísiu ekonómiku ne’e ladún favorese, tanba ne’e nia Conoco kontra.

“Tanba ne’e nia deside fa’an asaun mai ita, signifika sira respeita ita nia desizaun. Ba negosiasaun seluk ne’ebé akontese, ne’e iha dalan”, katak nia.

“Soké ita nia ekipa negosiál sei halo negosiasaun tuir mai, tanba la’ós de’it ho negosiasaun ida ne’e maka sei rezolve problema hotu maibé sei iha serbisu barak loos no ita boot (jornalista) sira sei hatene barak liu kona-ba posibilidade atu atinje objetivu ne’ebé lori kadoras greater sunrise mai TL akontese ka la’e”.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here