Deputada bankada FRETILIN, Angêlica Rangel. Imajen António Goncalves

DILI (TATOLI) – Deputada Bankada Fretilín, Maria Angélica liuhosi deklarasaun polítika hateten prátika burokrasia hanesan mákina estadu, ema balun politiza iha parte balun hanesan rekrutamentu no promosaun ba vaga no kargu profisionál sira, ikus liu relatóriu pareser Konta Jerál Estadu governu nunka implementa.

“Iha sorin seluk prátika hatudu burokrasia ne’ebé boot hanesan mákina estadu atu halo servisu no implementa programa dezenvolvimentu, ema balun politiza ninia rekrutamentu no promosaun ba vagas ka kargu profisionál sira, nune’e ema ne’ebé mak partidu la hanesan marginalizadu no ida ne’e sei fó impaktu ba implementasaun programa dezenvolvimentu no ezekusaun orsamentu no ikus mai mak ita haree iha relatóriu Konta Jerál Estadu, at liu mak rekomendasaun lubuk boot ne’e governu nunka halo tuir”, tenik iha plenária estraordinária kinta ne’e.

Nune’e nia dehan, Bankada Fretilín sempre fó hanoin katak bele halo mudansa, maibé mudansa mós ba rekursu umanu liu-liu mudansa ba mentalidade katak ema labele sukat de’it ba intelektualidade no skill, maibé hare mós ba servidór sira nia mentalidade ne’ebé di’ak.

Nia mós haktuir, orsamentu inisiál ba Orsamentu Jerál Estadu (OJE) 2016 ho montante $ 1.562,2 no sa’e ba 1.952,9 hare ba diferensa orsamentu ne’e hatudu mai ita katak iha tempu ne’ebá maski governu minoria, maibé tanba   hare ba kestaun estadu, Fretilín firme hodi fó apoiu ba governu atu halo dezenvolvimentu ba nasaun no povu ida.

Maski ita hare governu rasik kbiit laek eh la hatudu kapasidade hodi halo ezekusaun tuir lei no prosedimentu administrativu, ita bele hare momoos iha relatóriu Konta Jerál Estado 2016, ita hare husi halo virement husi kategoria ida ba kategoria seluk ne’ebé lei la fó dalan.

Nune’e, nia dehan tan Bankada Fretilín sempre kestiona konaba orsamentu hirak ne’ebé hamosu iha rubrika outros serviços diversos ne’ebé la diskrimina ninia valor, tan ne’e karik observa didi’ak iha rekomendasaun.

Hatudu diskrepánsia bo’ot los entre montante alokadu millaun $40.092 ho despeza millaun $40.166,2, montante alokadu ho despezas hatudu diferensa ida ho valor orsamentu $74.100.

Tuir loloos despeza hirak hanesan bele aplika ba halo uma eh estrada hodi ajuda povu, hadi’a sira nia moris, aplika fali ba rubrika outros serviços diversos ne’ebé potensiál teb-tebes ba mal prátika korrupsaun.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here