Parlamentu Nasionál (PN), ohin realiza sesaun plenária estraordinária hodi debate Konta Jerál Estadu 2016. Imajen António Goncalves

DILI, (TATOLI) – Parlamentu Nasionál (PN), liuhosi sesaun plenária estraordinária ohin realiza debate Konta Jerál Estadu 2016, biban aprezentasaun ne’e Ministra Finansa em ezersísiu, Sara Lobo Brites, hateten mesmu relatóriu Tribunál Rekursu (TR) haktuir inobservánsia (falta iha kumpre) balun iha orsamentu maibé verba ne’e válidu no tuir prinsípiu konstitusionál.

“Rekomendasaun ne’ebé formula iha relatóriu Tribunál Rekursu hateten tribunál nia rezerva inobservánsia ba orsamentu, defisiénsia ba konsolidasaun konta, falta informasaun ba konta no inkonsisténsia ho rejistu ne’ebé tetu ho sukat husi ajustamentu”, tenik nia iha uma fukun.

“Oservasaun husi rekomendasaun balun ne’ebé implementa ona Tribunál Rekursu, katak estasaun Konta Jerál Estadu ba fundu konsolidadu Timor-Leste husi fundu infraestrutura no fundu kapitál umanu ba tinan finanseiru 2016 válidu no halo tuir prinsípiu konstitusionál, legál no regulamentu sira, no Tribunál Rekursu hanoin konta ne’e iha ona kondisaun hodi Parlamentu Nasionál bele aprova”.

Nia hatutan tan tuir kompeténsia atu halo fiskalizasaun juridisionál relasiona ho Konta Jerál Estadu 2016, TR hato’o rekomendasaun 44 no pareser iha jullu 2017 ho konkluzaun no rekomendasaun ne’ebé formula iha relatóriu TR.

Governante ne’e rekoñese independentemente husi periúdu ba governasaun ida nia ukun, debate ne’ebé tenke halo iha uma fukun kona-ba Konta Jerál Estadu sai nu’udar pasu ikus liu hodi bele kumpre artigu 145o no 3 konstituisaun, ne’ebé konsagra respeitu ba prinsípiu báziku ida iha estadu direitu hotu-hotu ne’ebé defini katak ezekusaun orsamentu Estadu tenke submete ba eskrutíniu ka fiskalizasaun.

“Natureza juridisionál hodi haree ba ninia legalidade nomós natureza polítika husi aspeitu efisiensia no efikasia, nune’e iha implementasaun mak Parlamentu Nasionál kontribui tuir prosesaun lei sira ne’ebé mak vigora no Kámara Kontas iha Tribunal Rekursu mak nu’udar instánsia únika hodi halo fiskalizasaun ba legalidade despeza públika no julgamentu ba konta jerál Estadu”, katak tan.

Nune’e PN orgaun ne’ebé konstitusionalmente kompete atu aprova ho baze pareser ne’ebé mai husi TR, no atu ezérse kompeténsia ne’e PN liuhosi Komisaun C ne’ebé trata asuntu Finansa Públika halo apresiasaun relatóriu husi TR.

“Bazea ba rekomendasaun TR no Komisaun C hanesan preokupasaun husi deputadu sira iha uma fukun ida ne’e hato’o iha okaziaun barak kona-ba kualidade no ezekusaun orsamentu, atu instituisaun sira hotu utiliza ba dezenvolvimentu sosiál ekonómika no bem estar ba sidadaun”, katak.

Tuir ministra ne’e Governu Konstitusionál da-ualu sente no komprometidu iha responsabilidade no promove transparénsia iha utilizasaun rekursu públiku ho loloos liuhusi reforsa ninia instituisaun no hadi’a prosedimentu no regra sira ne’ebé vigora no halo reforma nesesária ba instituisaun sira iha área jestaun finansa públika hodi fó prestasaun di’ak ba povu.

Tanba ne’e kompromisu sira hatúr ona iha programa governu ba tinan sira tuir mai no estabelese ona Lei Orgánika Governu da-ualu nian hodi hili ministériu ida ba asuntu reforma lejislativa.

Deputada Maria Angélica husi bankada partidu Frente Revolusionária Timor-Leste Independente (FRETILIN) liuhosi deklarasaun polítika konsidera tinan ba tinan, PN tuir lei halo diskusaun ba Konta Jerál Estadu.

“Sira mai ho hanoin katak bele hadi’a, tanba ne’e bankada FRETILIN sujere ba governu atu implemeta ka konsidera mós rekomendasaun balun ne’ebé iha relatóriu ne’e rasik, maske ita hatene katak relatóriu ne’e seidauk atu julga membru governu balun”, tenik.

Tuir nia haree ba ezekusaun orsamentu ne’ebé la adekuadu entre planeamentu ho orsamentu, sei afeta ba orsamentu tuir mai no ikus tenke halo virement (halo mudansa montante orsamentu ba kategoria maibé la afeta ba montante OJE).

“Hatudu katak entre planeamentu no estimasaun orsamentu la sinkroniza ho nesesidade povu nian”.

Entretantu, tuir artigu 145 konstituisaun kona-ba OJE Governu mak halo no PN mak aprova. Nune’e mós lei orsamentu tenke prevee ho baze iha efisiénsia no efikásia, diskriminasaun reseita no despeza nian, no mós sees husi dotasaun no fundu sekretu sira.

Ikus liu, ezekusaun orsamentu sei iha fiskalizasaun hosi Tribunál Superiór Administrativu Fiskál no Kontas no mós hosi Parlamentu Nasionál.

Valór OJE 2016 ne’ebé aprovadu hanesan lei númeru 1/2016 14 janeiru hamutuk ho montante milliaun $1.562,2, ne’ebé iha redusaun husi OJE 2015 ho montante milliaun $1.570 (redusaun porsentu 0,5).

Liuhosi Lei númeru 10/2016 10 agostu, aprova tan Orsamentu Retifikativu (OR) 2016, ne’ebé altera ba milliaun $1.952,9, ne’ebé reprezenta aumentu milliaun $390,7 (+porsentu 25).

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here