Parlamentu Nasionál (PN), ohin realiza sesaun plenária estraordinária hodi debate Konta Jerál Estadu 2016. Imajen António Goncalves

DILI, (TATOLI) – Ministra Finansa em ezersísiu, Sara Lobo Brites, hateten Governu Konstitusionál da-ualu komprometidu implementa programa husi reforma oin-oin nu’udar medida polítika hadi’a jestaun finansa públika.

“Governu kompromete, liuhosi programa sira ne’ebé mak atu implementa, introdús no kontinua programa husi reforma oin-oin hanesan reforma fiskál no reforma iha despeza públika nu’udar medida polítika ida hodi hadi’a liután jestaun finansa públika iha ita nia rai”, tenik iha plenária bainhira partisipa debate Konta Jerál Estadu 2016.

Nia dehan iha área reseita, governu sei foka liu ba revizaun lejislasaun iha ámbitu autoridade nain rua (autoridade aduaneira no tributária) nomós moderniza sistema kobransa reseita ho efisiensia no efikás nomós hasa’e kapasidade rekursu umanu iha operasaun jestaun kobransa reseita.

Alende ne’e estabelese servisu adekuadu hodi hatan direitamenta ba sidadaun nia nesesidade no presta servisu di’ak liután ba sidadaun.

Iha área despeza governu sei halo revizaun ba kuadru legál sira hanesan lei orsamentu no jestaun finanseira no prosedimentu seluk hodi abranje kontrolu despeza ho efisiensia, rigor, atualiza no moderniza rejime jurídiku aprovizionamentu no kontratu públiku inklui kria enkuadramentu legál hodi define kritéria ba estabelesimentu ajénsia autónoma finanseiru sira hodi inklui kontrolu nesesáriu ba situasaun individa no rekonsiliasaun sira ba sira nia konta, katak tan.

Nune’e mós regulariza operasaun no ezekusaun dotasaun orsamentál ho rigór no transparénsia no atualiza sistema hodi fasilita prestasaun servisu ho lais, nomós hasa’e koñesimentu rekursu umanu, hadi’a sistema no assegura orsamentu bazea ba programa.

Governante ne’e mós akresenta atu kria monotorizasaun no kontrolu regulár ba ezekusaun orsamentál no reforsa regulamentasaun jestan kontrolu iha dívida esterna ba parseria públiku no privadu, inklui parseiru dezenvolvimentu no fundu espesiál sira.

“Sei reforsa mós mekanizmu kontrolu orsamentál bazea ba rekomendasaun sira husi Kámara Kontas no Parlamentu Nasionál”, katak.

Entretantu, governu agora dadauk implementa ona sistema Asycuda World iha Alfándega hodi kobre reseita, Sitgas iha atu kobre impostu sira no pagamentu jestaun finansa públika sira uza sistema Free Balance.

Sistema Asycuda rasik estabelese ona iha iha alfándega iha Batugade, Suai no tempu badak iha Oekusi, hodi sistema ne’e bele kapta informasaun ho di’ak, nune’e mós estabelese ona iha Autoridade Portuáriu Timor-Leste (APORTIL) hodi fasilita servisu importasaun no esportasaun sira iha portu.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here