Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI (TATOLI) – Governu liuhosi Konsellu Ministru (KM) aprova rezolusaun ne’ebé aprezenta husi Ministériu Administrasaun Estatál (MAE) ba Misaun Apoiu Prosesu Resenseamentu Eleitorál Guinea-Bissau (MAPRE-GB 2018), ne’ebé eleisaun ne’e sei realiza iha loron 18 Novembru 2018.

“Konsellu Ministru aprova Rezolusaun Governu, ne’ebé iha semana kotuk Señór Tomas Cabral halo aprezentasaun relatóriu, hafoin fila husi Guinea-Bissau, Konsellu Ministru rona no kaer rekomendasaun mak prodúz rezolusaun governu ohin, hodi kria misaun ida ita bolu Misaun Apoiu Prosesu Resenseamentu Eleitorál Guinea-Bissau”, Ministru Estadu Prezidénsia Konselhu Ministru, Agio Pereira ba jornalista hafoin reuniaun Ezekutivu iha Palásiu Governu kuarta ne’e.

Governante ne’e mós informa Rezolusaun Governu ne’e mós define nomea Tomas Cabral hanesan Xefe MEPRE-GB 2018 no define limite orsamentu ba misaun ne’e.

“Iha tempu hanesan nomea mós Tomas Cabral atu Xefia misaun apoiu ne’e, nó mós fundus atu apoiu ba Guinea-Bissau mak $80.000 resin másimu labele liu hodi fó apoiu ba prosesu eleitorál Guinea-Bissau ne’ebé misaun ne’e bele uza”, katak.

Entretantu, kriasaun MAPRE-GB 2018 husi pedidu apoiu organizasaun no realizasaun resenseamentu eleitorál ne’ebé solisita rasik husi Guinea-Bissau, tanba ne’e Governu Timor-Leste rekoñese importante kontribuisaun misaun timoroan atu apoiu prosesu eleitorál, ne’ebé estabelese ona iha tinan 2013 no 2014 atu fó apoiu realizasaun eleisaun livre no justu iha país ne’e.

Misaun ne’e sei fó asisténsia téknika, promove asaun formasaun no kapasitasaun rekursu umanu ba órgaun administrasaun eleitorál Guinea-Bissau no apoiu ekipamentu teknolójiku atu halo operasaun resenseamentu eleitorál.

Antes ne’e liuhosi desizaun KM loron 21 Agostu, aprova ona Proposta Rezolusaun Governu nian ne’ebé aprezenta husi Ministru Negósiu Estranjeiru no Kooperasaun, Dionísio da Costa Babo Soares, konaba nomeasaun Tomas Cabral hanesan Reprezentante Espesiál Governu RDTL nian ba Guinea-Bissau atu halo identifikasaun nesesidade Estadu nasaun membru CPLP ne’e, atu hala’o eleisaun livre no demokrátika.

Hodi rekoñese kontributu importante ne’ebé missaun nasaun Timor-Leste ba prosesu eleitorál Guinea-Bissau nian, atu nasaun ne’e hetan normalidade demokrátika no Timor-Leste hetan prestíjiu internasionál, hodi afirma determinasaun Governu Timor-Leste nian atu kontribui ba pás no seguransa internasionál, liuhusi fó apoiu ba asaun sira ne’ebé promove konsolidasaun rejime demokrátiku sira, respeitu ba direitu umanu no fortalesimentu Estadu sira ne’ebé Timor-Leste mantein relasaun amizade no kooperasaun nian ho sira.

Nune’e iha loron 21 Setembru, liuhosi reuniaun ezekutivu governu rona aprezentasaun relatóriu husi Reprezentante Governu Timor-Leste, Tomas Cabral konaba misaun esploratória apoiu Timor-Leste ba eleisaun Guinea-Bissau atu fó apoiu ba organizasaun eleisaun nian.

Delegasaun Timor nian, ne’ebé lidera husi Reprezentante Espesiál ne’e, vizita ona Guinea-Bissau husi loron 3 to’o 15 Setembru hodi hasoru malu ho autoridade lokál sira atu haree kondisaun sira ne’ebé eziste no identifika nesesidade sira ba organizasaun resenseamentu eleitorál no ba realizasaun eleisaun. Misaun apoiu nian ba prosesu eleitorál hahú halo ona iha loron 11 no 12 Setembru.

Tuir portál ofisiál governu, reprezentante espesiál antes ne’e hala’o ona sorumutu ho Primeiru-Ministru Guinea-Bissau, Aristides Gomes, iha sede Ajénsia Kooperasaun Timor-Leste (AKTL) nian iha Nasaun ne’e, ho objetivu atu ko’alia konaba resposta Governu Timor-Leste nian ba pedidu husi Governu Guinea-Bissau konaba apoiu ba eleisaun lejizlativa tinan ida ne’e.

Iha sorumutu ne’e, Xefe Governu Guinea-Bissau agradese ba prontidaun husi Governu-Timor nian atu tulun nasaun ne’e iha prosesu eleitorál no agradese mós ba apoiu Timor-Leste nian durante eleisaun tinan 2014, ne’ebé kontribui ba estabilizasaun país ne’ebá nian.

Durante sorumutu ne’e, Tomás Cabral entrega ona karta ida husi Primeiru-Ministru, Taur Matan Ruak, ba ninia omólogu.

Nune’e mós Tomás Cabral vizita mós Prezidente Repúblika Guinea-Bissau, José Mário Vaz, hodi ko’alia konaba prosesu eleitorál tinan 2018 nian. Prezidente ne’e, agradese tebes ba povu Timoroan, ne’ebé solidáriu nafatin ho ninia país maun-alin ne’e.

Biban ne’e José Mário Vaz, mós manda kumprimentus ba eis-Prezidente, Kay Rala Xanana Gusmão, no entidade Timoroan hotu ba sira-nia apoiu iha eleisaun sira liubá ne’e no apoiu ba prosesu eleitorál tinan 2018 nian.

Jornalaista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here