Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI (TATOLI) – Governu liuhosi reuniaun Konsellu Ministru (KM) ohin, aprova Proposta Dekretu Governu ne’ebé aprezenta husi Ministra Finansa em ezersísiu, Sara Lobo Brites, konaba regra ezekusaun Orsamentu Jerál Estadu (OJE) 2018 no Lei Orgánika Ministériu Petróleu no Minerais no Ministériu Ba Assuntus Kombatentes no Libertasaun Nasionál.

“Ita halo rezolusaun ida mak importante atu estabelese regra ezekusaun Orsamentu OJE 2018, tinan-tinan tenke iha rezolusaun governu nian hodi estabelese regra, tanba ne’e ohin aprova rezolusaun ida atu estabelese ona”, Ministru Estadu Prezidénsia Konsellu Ministru, Agio Pereira ba jornalista sira iha Palásiu Governu hafoin reuniaun ezekutivu.

Hodi hatutan, aprova mós dokumentu rua, ida mak Lei Orgánika Ministériu Petróleu no Minerais, no Ministériu Ba Assuntus Kombatentes no Libertasaun Nasionál.

“Ida ne’e hanesan lei orgánika dahuluk mak VIII Governu Konstitusionál aprova hodi tulun prosesu regras orsamentál nian, atu estrutura orgánika sira klaru nomós bele hatene diresaun sira mak ne’ebé, atu fahe orsamentu”, dehan tan.

Entretantu tuir portál ofisiál governu, diploma konaba regra ezekusaun OJE 2018 hodi estabelese normas no prosedimentu sira konaba ezekusaun, monitorizasaun, relatóriu ne’ebé aplika ba OJE no Seguransa Sosial ba tinan 2018 ho rigorozu no naton, husi akompañamentu ezekusaun orsamentál.

Bainhira OJE 2018 vigora ona, permite retoma normalidade ezekusaun orsamentál no hatan ba nesesidade ne’ebé sai prioridade no favorese liu ba kresimentu ekonomia, proporsiona kondisaun atu governu bele lansa baze ezekusaun programa governu nian.

Parte seluk, Lei Orgánika Ministériu Petróleu no Minerais hanesan entidade govermentál ho responsabilidade iha konsesaun, ezekusaun, implementasaun, avaliasaun no akompañamentu polítika ne’ebé define no aprova ona husi governu atu área enerjia, petróliu, gas, no rekursu minerais.

Ho aprovasaun lei orgánika ne’e, Ministériu Peróliu no Minerais ho estrutura dinámika no efisiente bele hatán ezijénsia téknika ne’ebé sempre mosu iha atividade sira no ezerse orientasaun naton no kontrolu, inklui matéria lisensiamentu ambientál.

Nune’e mós ho aprovasaun Lei Orgánika Ministériu Ba Assuntus Kombatentes no Libertasaun Nasionál, nu’udar forma atu fó dalan ba ministériu atu forma estrutura organizasaun no funsionamentu ne’ebé permite hetan jestaun servisu no rekursu umanu ezisténsia ne’ebé efisiénsia.

Ministériu ne’e iha misaun ezekuta, kondena no avalia polítika, ne’ebé define no aprova husi Konselhu Ministru, atu área assuntu kombatente no libertasaun nasionál, rekonhesidu no valorizadu, tuir buat ne’ebé konsagra ona iha Konstituisaun.

Biban ne’e reuniaun ezekutivu mós aprova Rezolusaun Governu konaba nomeasaun membru Komité Polítiku Revizaun OJE tinan 2019, ho objetivu verifika alokasaun estratéjika rekursu hodi atinje kompromisu no objetivu ne’ebé iha dokumentu estratéjiku no sukat ezekuibilidade planu ba tinan finanseiru 2019, atu elabora proposta OJE ne’ebé sei submete iha Parlamentu Nasionál (PN) iha loron 8 Novembru 2018.

Prezidente ba Komité ne’e mak Primeiru-Ministru (PM), Taur Matan Ruak, Vise-Prezidente mak Ministra Finansa em ezersísiu, Sara Lobo Brites, no membru sira mak Ministru Estadu Prezidénsia Konsellu Ministru, Ministru Planeamentu no Investimentu Estratéjiku em ezersísiu, Ministru Negósiu Estranjeiru ni Kooperasaun, Ministru Obras Públika no Ministru Agrikultura Peska, no observadór sira mak Ministru Reforma Legislativa Assuntu Parlamentár no Sekretária Estadu Igualdade no Inkluzaun.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here