Ministru Prezidensia Konsellu Ministru, Hermenegildo Pereira. Imajen Antonio Goncalves

DILI (TATOLI) – Konsellu Ministru (KM) halo análize ba aprezentasaun husi ekipa Whales and Dolphins in Timor-Leste, konaba planu dezenvolvimentu sustentável eko-turizmu mariñu iha Timor-Leste Baleia no Goldinhu (scubazoos).

“Konsellu Ministru apoia aprezentasaun ne’ebé hanesan inovasaun tanba ba-dahuluk peritu no sientista sira fó ona tempu no kursu atu projeta ita nia rai hanesan rai ne’ebé rikusoin tasi, hodi nasaun seluk rekoñese katak úniku”, tenik Ministru Estadu Prezidénsia Konsellu Ministru, Agio Pereira ba jornalista sira iha Palásiu Governu, Kuarta ne’e.

Tuir governante ne’e, aprezentasaun “Timor-Leste from below” importante tebes tanba  ko’alia konaba eko-turizmu, hanesan ita nia rikusoin baleia sira ne’ebé mak tuir nasaun seluk dehan úniku iha Timor-Leste mak espésie blue whale no sperm whale.

“Sira hakarak iha tinan 10 nia laran bele dezenvolve hodi fó apoiu ba ekonomia iha ita nia rai, tanba  matenek na’in sira hateten bainhira ita dezenvolve didi’ak bele kontribui biliaun $2 ba ita nia ekonomia. Hanesan tulun sustentabilidade ekonomia iha ita nia rai no bele dada mós ema tokon ba ita nia rai nu’udar prizma hare tuir turizmu ninian”, katak.

Entretantu, aprezentasaun ne’e konaba proposta atu transforma Timor-Leste sai hanesan referénsia ba nivel sudeste aziátiku iha turizmu tasi okos no observasaun ba baleia.

Planu dezenvolvimentu ekonomia ne’ebé sustentável husi eko-turizmu mariñu iha Timor-Leste bele fasilita halo peskiza nesesária no halo kobertura mediátika atu koloka nasaun joven ne’e iha mapa eko-turizmu nivel global.

Nune’e mós atu kria lojístika ne’ebé nesesáriu no infraestrutura atu halo protesaun no konservasaun ba vida mariña.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here