Primeiru-Ministru, Taur Matan Ruak, ho Prezidente Autoridade RAEOA, Mari Alkatiri. Imajen/ António Goncalves

DÍLI, (TATOLI)-Eis-primeiru-ministru, Marí Alkatiri hateten katak kuarta (03/10) nu’udar loron ida importante tebes tanba Primeiru-ministru Taur Matan Ruak bele responde nia karta hodi esplika kona-ba Oe-cusse iha Konsellu-ministru.

Nune’e mós Prezidente Parlamentu Nasionál, Arão Noe konvida nia hodi sai oradór iha konferénsia ba komemorasaun loron demokrasia universál ba da-21, hanesan eis-primeiru-ministru no Prezidente Rejiaun Administrativa Autonoma Espesiál Oe-cusse Ambeno (RAAEOA).

“La tama ho odiu, la tama ho sentidu vingansa, tama atu buka interasaun di’ak liu atu lori ita-nia rain ne’e di’ak ba oin. Ha’u husu primeiru-ministru simu i ha’u ba duni Konsellu-ministru ohin dader (horseik, 03/10),” hateten eis-xefe-governu, Marí Alkatiri, iha salaun Ministériu Finansa, Aitarak laran-Díli, bainhira sai oradór ba Tendências globais: aumento do populismo, aprofundamento da desigualidade, cidadãos marginalizados a questionarem o futuro e as principios a á instituições democráticas.

“Kontente tebes mós tanba konvite mai husi Prezidente Parlamentu Nasionál ha’u mai iha ne’e, iha konferénsia ida ne’e, atu ko’alia buat ida dehan desgaste demokrasia. Ida ne’e iha sasan barbarak; iha demagosia, populizmu,” reforsa eis-xefe governu Marí Alkatiri.

Sekretáriu jerál FRETILIN (Frente Revolucionário de Timor-Leste Indepedente) ne’e esplika katak demokrasia reprezentantiva, demokrasia multipartidária, inisiativa mai husi Parlamentu, inisiativa mai husi órgaun ida importante atu fó vida ba demokrasia. Parlamentu Nasionál órgaun ida importante atu fó vida ba demokrasia.

Se mak harii partidu polítiku, sempre buka atu manan, manan atu ukun. Maibé ukun ne’e saida loos? Se ita manan maioria, ita ukun, signifika katak sira be la hetan maioria ne’e, sei la reprezenta ona buat ida? “Ha’u-nia opiniaun kompletamente kontrária,” subliña sekretáriu jerál, Marí Alkatiri.

Tanba tuir sekretáriu jerál Marí Alkatiri katak partidu hothotu ne’ebé mak reprezenta povu iha Parlamentu, reprezenta buat ruma, maibé hothotu hamutuk mós la reprezenta povu tomak. “Tanba ne’e mak ita iha sosiedade sívil, tanba ne’e mak ita iha instituisaun barak iha nível sosiedade ne’ebé mak ita tenke interaje,” esplika eis-primeiru-ministru, Marí Alkatiri.

La Subar

Eis-ezekutivu governu konstitusionál da-hitu, Marí Alkatiri mós esplika katak se ita haluha prínsipiu fundamentál inkluzaun; inkluzaun polítika, inkluzasaun ekonomia sosiál, inkluzaun ekonómika, entaun lejitimidade ne’ebé ita manan iha urnas ne’e bele la iha signifikadu. Ne’e situasaun reál iha Timor-Leste.

“Hothotu hatene katak ha’u la gosta subar saida mak iha ha’u-nia hanoin. Ha’u mai iha ne’e atu subar, di’ak liu lalika mai. Situasaun reál iha ita-nia rain, presiza muda atitude ida ne’e, presiza muda prátika ida ne’e; viciassão do exercício do poder!,” hateten Alkatiri.

“Ha’u la’ós dehan labele ukun, ha’u dehan ukun, buka lejitimasaun ba ita-nia lejitimidade kada dia. Ita hetan lejitimidade parsiál, mezmu maioria mas não é total. Tanba ne’e, loron ida ohin ha’u hanoin importante tebes ba ha’u-nia vida polítika rasik, tanba ha’u konsege rompe ho tabus balun i ha’u deside ba Konsellu-ministru, no deside mai duni iha ne’e,” nia reforsa tan.

Eis-primeiru-ministru, Marí Alkatiri hateten, kualker lejitimasaun poder ne’e, halo bele komesa iha urnas maibé tenke iha kontinuidade ba poder ne’e rasik.

Se la iha kontinuidade ba exersísiu poder, entaun bele lakon poder ne’e mezmu kontinua governa. Maioria mas lakon lejitimidade tanba siklu eleitorál, tinan lima bele kontinua governa maibé lakon lejitimidade.

Se rai ida hanesan Timor-Leste, komesa harii estadu, se estadu fraku, estadu la inkluzivu, nasaun nunka mais sei sai forte. Nunka mais ita bele harii nasaun, atu halo nasaun forte. Estadu forte, nasaun forte.

“Inkluzaun poder. Ha’u la dehan, se mak la manan tenke ba governu mas Parlamento é um órgão de dialógo, não é de confrontação. Confrontação de vez em quando há maibé imediatamente tenke halo kontensaun, tenke loke dalan ba dialógu; la’ós konfrontasaun permanente. La’ós votu de’it mak importante, importante atitude idaidak ninian,” dehan Alkatiri.

Sekretáriu jerál FRETILIN ne’e afirma, ita hothotu hakarak defende povu nia interese. Se ita tuun ba halo kampaña dehan ita la defende povu nia interese, entaun di’ak liu lalika halo kampaña.

“Prátika defende interese povu ne’e hanusa? Povu mak ita hotu hamutuk. Ha’u mai lakohi ko’alia rai seluk, ha’u mai ko’alia atuál iha Timor-Leste. Ha’u bele dehan, ha’u ko’alia sein odiu, sein vingansa, up and down (sa’e no tuun) ne’e ha’u abituadu ona,” refere sekretáriu jerál FRETILIN, Marí Alkatiri.

Nia konsidera katak konferénsia hodi komemora loron universál demokrasia ne’e importante tebes tanba espera depois konferénsia ne’e hothotu rona malu, bele ko’alia ba malu, bele hahú prosesu dialógu ida importante tebes ba ita-nia rain ne’e.“Desde que ita hatene fó didi’ak karakter demokrátiku ba ita-nia Parlamentu,” konklui eis-primeiru-ministru, Marí Alkatiri.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here