Lider nasionál sira bainhira partisipa konferénsia internasionál ba selebrasaun tinan 21 deklarasaun universál demokrasia ne’ebé organiza hosi Parlamentu Nasionál iha salaun ministériu finansa. Imajen António Goncalves

DILI, (TATOLI) – Rede sosiál hanesan ondas demokratizasaun foun, tanba ho meius ne’ebé lais ba ema hotu atu utiliza tuir ida-idak nian interese ne’ebé dalaruma hamosu mós tendénsia agresivu.

Panelista sira hanesan Prezidente Konsellu Imprensa, Virgilio Guterres, delegadu ajénsia notísia hosi Portugal Lusa, António Sampaio, eis-Primeiru-Ministru, Rui Maria Araújo, Komisária Komisaun Funsaun Públika, Maria Domingas Alves, bainhira ko’alia ba sesaun daruak konferénsia internasionál selebrasaun tinan 21 deklarasaun universál demokrasia ne’ebé organiza hosi Parlamentu Nasionál iha salaun ministériu finansa, ohin, ho tema oinsá influénsia rede sosiál iha demokrasia.

Prezidente Konsellu Imprensa, Virgilio Guterres, iha ninia aprejentasaun hatete: “Oinsá rede sosiál sira bele influénsia demokrasia, ha’u nia resposta mak fó influénsia boot. Hafoin tinan 1990 ne’ebé rede sosiál komesa mosu, tuir ha’u nia hanoin dala ruma bele mosu buat ne’ebé ema balun la konkorda hanesan ondas demokratizasaun foun”.

Nia dehan labele nega, tanba rede sosiál hanesan buat ne’ebé ema hotu uza, tanba rezisténsia ba ukun án hafoin 1990 inklui mós rede sosiál bele rejista rezisténsia timor nian sai movimentu libertasaun ne’ebé mak ninia grupu solidaridade internasionál ne’e barak liu iha mundu.

“Pergunta mak oinsá rede sosiál bele sustenta demokrasia ida saudável no nakloke ba partisipasaun públika, entaun ida ne’e implika, katak ita nia sosiedade presiza prepara án”, dehan tan.

Nia haktuir dalaruma deputadu balun halo intervensaun iha plenária bazea ba mensajen hosi abitante, ne’e tuir nia influénsia di’ak ba demokrasia, tanba hahú uza rede sosiál hodi hato’o ba nia reprezentante sira iha kona-ba sira nia problema.

“Efeitu kolaterál husi rede sosiál ne’e mak la naton de’it ba ita atu partisipa maibé mós atu iha igualdade utilizasaun ba rede sosiál sira, iha ne’e mak ita ko’alia kona-ba desentralizasaun informasaun no demokrasia dijitál ne’ebé mak ema hotu tenke liu husi dijitál literacy (literasia/hatene lee no hakerek) no tenke hatene uza meius komunikasaun sosiál, nune’e bele iha kapasidade atu simu informasaun ne’ebé serve ba nia dezenvolvimentu pesoál nomós bele fortalese kapasidade atu halo intervensaun hodi hato’o ninia espresaun”, katak.

António Sampaio hatete dadauk utilizadór rede sosiál iha Timor-Leste maizumenus 410.000, husi númeru ne’e, 390.000 asesu liuhosi telemovel, signifika kualker momentu sira bele interven iha vida públika no sosiál iha kualker momentu no fatin.

“Númeru ne’e boot liu duke ema ne’ebé haree televizasaun, rona radiu no lee jornál, maske dalaruma sei husu ema kona-ba televizasaun, jornál, radiu nu’udar meiu ba sira nia opiniaun, maibé Timor-Leste hanesan fatin seluk ne’ebé ema uza liu facebook (rede sosiál) ba buat hotu”, tenik.

Nia hatutan: “Imajen mate isin, vídiu foin sa’e sira nian, imajen relijiaun, komunikasaun ofisiál instituisaun sira nian, intervensaun polítika direita, polítiku sira no partidu sira mós hola parte iha rede sosiál, nomós organizasaun balun uza ida ne’e nu’udar dalan atu bele hato’o sira nia opiniaun ba populasaun”.

Nia dehan tan debate kona-ba igualdade jéneru, direitu LGBT, meiu ambiente no seluk tan komesa maka’as iha rede sosiál, ida ne’e bele haree iha pájina facebook hanesan fatin ba moda, negosiasaun, merkadu, hato’o opinian polítika, ne’e halo partisipasaun sai demokrátiku liután husi partisipasaun ema oin-oin.

Nune’e mós Komisária Komisaun Funsaun Públika, Maria Domingas Alves, hatutan konstrusaun demorasia iha Timor-Leste pasa husi luta istórika no traumátika, ohin ita liu husi revolusaun dijitál ne’ebé iha rede sosiál hanesan intrumentu boot ida.

“Rede sosiál ohin loron iha poder boot, ne’ebé permite utilizadór sira iha komputadór ka telemovel bele fahe opiniaun ba ema barak, rede sosiál modifika forma polítika ba espresaun husi partidu polítiku sira, movimentu polítiku sosiál no influénsia direita ba mídia adisionál, tanba rede sosiál iha abilidade aplikasaun atu informa lais liu”, katak.

Hatutan mós hosi eis-Primeiru-Ministru, Rui Maria Araújo, peskiza sientífika konfirma diskusaun online ne’e hatesan métodu impesoál, katak ita sei la hasoru ema, lahanesan bainhira ita kontaktu direta (oin ba oin).

“Diskusaun online fasilita ema atu lakon sira nia tauk, kompara ho face to face, ema kuandu halo diskusaun online iha tendénsia liu sai agresivu, imposivu no fasil atu la kontrola án, tanba la infrenta direitamente ninia interlokutór ka ema ne’ebé nia halo diskusaun, satan bainhira uza identidade falsu hanesan agora dadauk barak iha rede sosiál”, tenik.

Nia dehan tan enkuantu kontaktu direta, envolve espresaun, jestu, kontaktu matan, halo ema hanoin dala rua molok ofende ema ne’ebé iha opiniaun la hanesan, kompara ho debate online fasil liu ema atu hamosu buat sira ne’e.

“Tradisionalmente rede sosiál koñesidu meiu atu fasilita movimentu sosiál no kria kondisaun ba demokratizasaun iha país barak ne’ebé adopta ditadura. Hanesan movimentu tasi mos iha facebook, liuhosi rede sosiál ne’e movimenta ema hamos tasi”, katak.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here