Prezidente Repúblika, Francisco Guterres Lú Olo, bainhira halo diskursu iha seremónia toma pose Vise Xefe Estadu Maior Jenerál F-FDTL, Falur Rate Laek, ne’ebé hala’o iha Palásiu Prezidensiál, segunda (1/10/2018). Imajen António Gonçalves

DILI (TATOLI) – Estadu Timor-Leste (TL) liuhosi Prezidente Repúblika, Francisco Guterres “Lu-Olo”, hato’o nia manifestu solidáriu ba vítima sira ne’ebé afetadu ba dezastre naturál, ne’ebé akontese iha Palu, Sentrál Sulawesi, Indonézia.

“Ita manifesta ita nia solidariedade ba vítima sira ne’ebé afetadu ba tsunami iha Sulawesi,” Xefe Estadu, Lu-Olo ba jornalista sira hafoin partisipa Konferénsia Internasionál ho tema “Celebração do 21o Aniversário da Declaração Universal sobre Democracia,” ne’ebé realiza iha Salaun Ministériu Finansa, Ai-tarak laran, ohin.

Apoiu Estadu TL nian ba vítima tsunami, Lu-Olo, dehan ida ne’e kompeténsia governu nian atu toma medida.

Nune’e mós, Parlamentu Nasionál (PN) liuhosi plenária Tersa, horisehik fó ona votu pezár ba vítima rai nakdoko no tsunami (Tasi sa’e) iha Sentrál Sulawesi ho rezultadu votu afavor 48.

Enkuantu Sekretáriu Estadu Komunikasaun Sosiál, Mericio Juvinal Dias “Akara”, dehan Governu liuhosi reuniaun Konsellu Ministru, ohin bele fó sai ona rezultadu katak sá apoiu mak Estadu ne’e bele ajuda ba afetadu dezastre naturál ne’e.

Rai nakdoko no tasi sa’e iha Palu, Sentrál Sulawesi akontese iha 28 Setembru, loro kraik rai nakdoko ho magnitude 7,4 eskala richer no ikus mai tsunami mosu to’o metro rua.

Totál vítima ba dezastre naturál ne’ebé autoridade sira fó sai iha Tersa horisehik, (2/10), hosi detikNews rezulta ema mate hamutuk 1.234, ne’ebé Ajénsia TATOLI sita hosi.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here