Ministru Obras Públikas, Salvador Soares dos Reis Pires. Imajen António Goncalves

DÍLI, (TATOLI)-Ministériu Obras Públika (MOP) sei kria tan dekretu lei hodi aprezenta ba iha Konsellu-ministru, hodi hetan aprovasaun atu halo planeamentu urbana Timor-Leste nian.

Ministru Salvador Soares dos Reis Pires informa katak iha ona lei ida ne’ebé aprova iha sestu governu konstitusionál liuhusi MPIE (Ministériu Planeamentu no Investimentu Estratéjiku. Agora MOP sei halo tan instrumentu dekretu lei tolu hodi fasilita ministériu atu dezenvolve planeamentu urbanu. Lei ne’e mak hanesan  dekretu lei jestaun teritoriál, klasifikasaun uzu solu no urbanizasaun no edifikasaun.

“Kuandu lei tolu ne’e iha tan, ita bele halo planeamentu urbanu nomós regulamentu ki’ikoan sira hodi kontrola ema hela dook iha estrada hanusa? Ita organiza sidade. Entaun ida ne’e mak ita tenke iha uluk,” informa ministru Salvador Soares dos Reis Pires, ba jornalista sira iha salaun Lalini-Larigutu, edifísiu CNE (Centro Nacional das Eleições), Colmera-Díli, ohin.

Governante ne’e akresenta, espesífiku baze instrumentu sira ne’e, baze legál ne’e bele estabele sustenta ita-nia asaun planeamentu urbanu nomós regula kreximentu ambiente fíziku ne’ebé ita-nia sidadaun sira instala iha ita-nia sidade.

Kona-ba jestaun movimentu transporte, tráfiku, ministru ne’e hateten katak ne’e kabe ba kapasidade Ministériu Transporte no Komunikasaun (MTK), maibé vizaun ba iha tan ponte ida, melloramentu kona-ba rede estrada barak, ponte barak ne’e para fasilita movimentu sira.

“Ha’u kontente para ita bele iha efeitu katak agora ne’e ita-nia movimentasaun ne’e iha sidade iha Leste ba weste no weste ba leste di’ak liutan tanba prezensa ponte ne’e. Ita iha opsaun rua, la’ós de’it ponte Comoro (CPLP I), iha tan CPLP III. Ita iha opsaun rua atu hili atu asesu ida,” konsidera ministru Salvador Soares dos Reis Pires.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here