Prezidente Repúblika, Francisco Guterres Lú Olo. Imajen António Goncalves

DILI (TATOLI)—Prezidente Repúblika, Francisco Guterres Lu-Olo, husu ba sidadaun sira atu aproveita meius teknolojia ne’ebé ás atu aprende siénsia duké aproveita hodi hatún adversáriu polítiku sira nia dignidade.

“Ha’ u haree katak ita-nia ema balun, envezde uza teknolojia ás ne’e hodi aprende ba beibeik siénsia ruma, sira uza liu-tan atu hatún adversáriu polítiku sira-nia dignidade , inklui figura importante sira hosi ita-nia prosesu libertasaun nasionál no ita-nia Estadu Direitu Demokrátiku,” nia dehan liuhusi ninia deskursu iha selebrasaun aniversáriu Deklarasaun Universál Kona-ba Demokrasia Ba Dala-21 ne’ebé hala’o iha salaun Ministériu Finansas, Aitarak-Laran, kuarta ne’e.

Iha reuniaun sira seluk, nia haktuir, nia ko’alia ona kona-ba uza meius teknolojia ás, teknolojia informasaun hosi anónimu no ema sira ne’ebé lahatene katak importante tebe-tebes hatene respeita dignidade ema seluk nian.

“ha’ u hein katak entidade relevante sira sei hahú hanoin oinsá halakon vísiu át ida ne’e, ne’ebé estraga ita-nia relasaun no viola prinsípiu importante liu iha Demokrasia: respeita ema seluk hanesan ita respeita ita-nia an,” Xefe Estadu fó hanoin.

Lú Olo informa katak ohin loron ita iha sesu ba meiu komunikasaun lais no efisiente liu ne’ebé fó dalan ba ita liu koñesimentu no ita bele hakbesik-an liután ba ema ne’ebé ita labele ko’alia, oin ba oin.

“Vídeo-konferénsia, telekonferénsia no rede sosiál mosu ohin loron nu’ udar meiu efetivu tebe-tebes atu troka idéias no koñesimentu, iha momentu ne’ebé de’ it, no nune’e, sidadaun sira bele hasa’e sira-nia kapasidade análize no krítika. Bainhira sosiedade ida ladún iha espíritu krítiku, ladún iha kapasidade atu haree no hanoin kle’an, demokrasia labele buras no ambiente ida ne’e loke dalan ba kuda rejime autoritáriu sira,” nia haklaken.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here