Prezidente Repúblika, Francisco Guterres Lú Olo. Imajen António Goncalves

DILI (TATOLI)—Prezidente Repúblika, Francisco Guteres Lú Olo, subliña katak enkuantu ki’ak no mukit ne’e buras nafatin, iha dezigualdade sosiál, sosiedade labele sai demokrátika.

“Ki’ak no mukit labele la’o hamutuk ho Demokrasia tanba ki’ak no mukit la fó dalan ba valór importante sira hanesan dignidade no desénsia umana,” Xefe Estadu afirma liuhusi ninia deskursu iha selebrasaun aniversáriu Deklarasaun Universál Kona-ba Demokrasia Ba Dala-21 ne’ebé hala’o iha salaun Ministériu Finansas, Aitarak-Laran, kuarta ne’e.

Lú Olo hatutan katak demokrasia ezije ita halo luta hasoru ki’ak no mukit, ezije luta atu hamosu desénsia umana, dignidade no respeitu ba Ditreitus Umanus.

Maske nune’e, nia rekoñese katak demokrasia eziste duni iha nasaun foun ida ne’e (Timor-Leste).

“Ho orgullu no laran-haksolok maka ha’u afirma ohin, iha ne’e, ba belun sira ne’ebé tulun harii no hametin ita-nia Estadu, katak demokrasia la’o duni ba oin iha Timor-Leste,” Xefe Estadu afirma liuhusi ninia deskursu liuhusi selebrasaun aniversáriu Deklarasaun Universál Kona-ba Demokrasia Ba Dala-21 ne’ebé hala’o iha salaun Ministériu Finansas, Aitarak-Laran, kuarta ne’e.

Nia hatutan demokrasia konsagra ona iha TL ho hanoin no perspetiva oi-oin, moris kahur malu ho etnia, rasa, relijiaun no expresaun linguístiku-kultural oi-oin, fó ona ezemplu fraternidade no toleránsia.

“Buat hotu-hotu ne’ebé ita hakarak hametin iha ita-nia rai ki’ik ida ne’e, tanen dahuluk povu ninia hakarak maibé tanen mós dokumentu internasional importante sira, hanesan Karta Nasoens Unidas no Deklarasaun Universál Direitus Umanus no Deklarasaun Universál kona-ba Demokrasia ne’ebé ohin ita fó-hanoin ninia aniversáriu ba dala rua nulu resin ida, iha Pátria Nicolau Lobato nian,” Lú Olo haklaken.

Entretantu, Prezidente Repúblika fó agradese ba Prezidente Parlamentu Nasionál, Arão Noé de Jesus, ne’ebé konvida nia loke konferénsia kona-ba loron Demokrasia ida ne’e, ne’ebé foin marka iha Timor-Leste ba dahuluk Deklarasaun Universál kona-ba Demokrasia, asina tinan rua nulu resin ida liu-ba iha sidade Cairo, Egipto, hosi reprezentante rai atus ida rua nulu resin ualu nian.

“Ho haksolok maka ha’u partisipa dala ida tan iha eventu ida organiza hosi Parlamentu Nasionál, ne’ebé hahú la’o horiuliuk hanesan Asembleia Konstituinte, ita-nia Uma Demokrátiku primeiru, hafoin referendu 1999 no molok ita restaura ita-nia independénsia, iha 20 Maiu 2002,” Lú Olo haktuir.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here