DILI, (TATOLI)- Inspetór Jerál Traballu (IJE) Sekretáriu Estadu Formasaun Profisionál no Empregu (SEFOPE), Rofino Lopes dos Reis, hatete empreza estranjeiru balun ne’ebé eziste iha Timor-Leste ho nivel ki’ik dalaruma laiha kapasidade atu selu koima bainhira komete infrasaun.

“Ami bá halo inspesaun realidade ita hetan nafatin infrasaun ne’ebé mosu tanba ita iha problema ida agora, ema estranjeiru mai loke nia negósiu, ita-nia Governu fó lisensa ida ne’e prejudika ami sira ne’ebé halo inspesaun, pur tantu kompañia ho nivel ki’ikoan laiha kapasidade finanseira atu halo nia negósiu, tanba ne’e dalabarak sira viola lei traballu, lafó serbisu ema barak, ema ida de’it no dalaruma ita aplika sansaun nia laiha kapasidade atu selu”, Rofino dehan iha Kaikoli, ohin.

Tanba ne’e sai kestaun entre ministeriál liuliu Servisu Rejistu no Verifikasaun Emprezariál (SERVE) tenke haree ba ida ne’e.

“La’ós hotu-hotu, mas ita haree balun laiha kapasidade duni entaun ami tenke blacklist (lista negra) tiha nia kompañia depois selu tiha multa mai loke filafali. Situasaun ida ne’e prejudika duni ita se haree kompañia mai ho nivel ida ne’ebé ki’ikoan, ita haree katak nia laiha kapasidade atu fó serbisu ema. Dalaruma fó serbisu ema ida, fulan ida, rua nia bele selu, mas liu ida ne’e laiha ona, entaun ne’e prejudika mós. Ha’u hanoin ida ne’e la’ós kestaun SERVE de’it, SEFOPE de’it mak enjerál. Ita hanoin lei ba asuntu sira ne’e tenke hadi’a”.

Hatutan problema mak lei fó dalan atu ema li’ur halo atividade tanba ne’e di’ak liu mak hadi’a lei no Oitavu Governu ida ne’e iha Ministériu Reforma Lejislativa no Asuntu Parlamentár maka presiza atu diskute hamutuk.

“Hanoin ami tenke diskute buat ne’e, ita presiza ema atu mai investe para fó serbisu ba maluk sira, maibé iha aspetu balun haree katak bele mós kria problema sosiál tanba se nia laiha kapasidade, fó sebisu ema ida de’it depois nia loke espésie kioske, legalmenta halo negósiu tanba iha lisensa, agora IJT haree nia fó serbisu ema tuir lei ka la’e? Dalaruma nia fó kontratu ema ida, maibé laselu nia oras estra entaun ita haruka nia selu tanba halo infrasaun, iha sansaun ne’e nia laiha kapasidade atu selu, entaun to’o tempu ami blacklist tiha kompañia sira ne’e depois sira selu ami loke fali, ida ne’e situasaun ne’ebé ami hasoru”, katak

Rofino dehan iha kompañia lubuk ida inklui empreza boot mós blacklist hotu tanba laiha osan atu selu koima, bainhira selu tiha ba Estadu no lori resibu bá SEFOPE hafoin loke filafali nune’e bele kontinua nia atividade.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here