Membru Parlamentu Nasional. Imajen/dok.TATOLI

DILI, (TATOLI) – Parlamentu Nasionál (PN) liuhosi plenária tersa ne’e fó votu pezar ba vítima rai nakdoko no tsunami (tasi sa’e) iha Sentrál Sulawesi (Indonézia) ho rezultadu votu a favór 48.

Deputadu David Ximenes Mandati husi Bankada partidu Frente Revolusionária Timor-Leste Independente (FRETILIN) sujere atu votu ne’ebé PN fó mós inklui manifestasaun preukupasaun ba estudante timoroan nain haat ne’ebé hala’o estudu iha Universidade Tadulako Palu, Sentrál Sulawesi no hafoin dezastre ne’e família seidauk hatene sira nia paraderu.

Sekretáriu Estadu Komunikasaun Sosial, Merício Juvenal dos Reis Akara, ne’ebé reprezenta governu iha PN hatete aban bainhira reuniaun Konsellu Ministru mak sei ko’alia kona-ba oinsá Timor-Leste nia solidaridade ba Sulawesi, hanesan mós momentu ne’eba rai nakdoko iha Lombok no liuhosi reuniaun ezekutivu, foti desizaun fó apóia umanitária. Apoiu ne’e, normalmente governu sempre fó apoiu finanseiru.

Kona-ba estudante timoroan nain haat ne’ebé halo hela estudu iha Palu, tuir governante ne’e, Ministériu Negosiu Estranjeiru informa ona estudante hirak ne’e iha ona kontaktu no sira nia kondisaun di’ak.

“Ita kontente tanba ita nia ema laiha mak sai vítima, maibé ita tenke akampaña loron-loron tanba tsunami ne’e nia impaktu makas no to’o agora vítima balun seidauk identifika”, katak.

Entretantu iha loron 28 setembru loraik rai nakdoko ho magnitudu 7,4 eskala richer no ikus mai akontese tsunami to’o metru rua iha Palu, Sentrál Sulawesi

To’o ohin loron, dadus atuál husi autoridade rejista ona ema nain 925 mak mate, nain 799 kanek no ema 59.450 evakua ba fatin evakuasaun provizóriu, nune’e mós uma hamutuk 65.733 mak aat hafoin dezastre naturál ne’e.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here