Sekretáriu Estadu Komunikasaun Sosiál (SEKOMS), Merício Juvenal dos Reis Akara. Imajen Antonio Goncalves

DILI (TATOLI)—Sekretáriu Estadu Komunikasaun Sosiál, Merício Juvinal Akara, ohin simu vizita husi Embaixadora Nova Zelándia iha Timor-Leste, Vicki Poole hodi ko’alia konaba kooperasaun iha área komunikasaun sosiál.

“Ita hotu hatene Nova Zelándia nasaun ida ne’ebé kleur ona halo kolaborasaun ho ita, sira makas iha setór edukasaun, setór transparénsia di’ak iha mundu. Ohin ami ko’alia oinsá bele servisu hamutuk iha parte komunikasaun sosiál, apoiu Konsellu Imprensa di’ak liu, jornalista no media sira bele halo knar di’ak liu tan no oinsá bele kontinua komunika malu iha parte dezenvolvimentu kapasidade rekursu umanu,” Sekoms informa hafoin hasoru malu, ohin iha Palásiu Governu.

Rezultadu hosi enkontru ohin, iha sinál pozitivu, iha hanoin atu komunikasaun sira ne’e sei kontinua no ekipa tékniku sira mós sei kontinua ko’alia ba malu, saida mak bele apoia liu-liu iha área komunikasaun sosiál, hanesan oinsá apoia média, dezenvolve ita nia feto sira atu partisipa iha setór media la’ós hanesan jornalista de’it, maibé bele hetan pozisaun di’ak hanesan Xefe Redasaun no seluk tan.

Embaixadora Nova Zelandia. Imajen Antonio Goncalves

Parte seluk, Embaixadora Nova Zelándia iha Timor-Leste, Vicki Poole hateten, komunikasaun, media no informasaun importante ba demokrasia, nune’e Nova Zelándia sei hare asuntu ne’e.

“Ami hare ida ne’e hanesan oportunidade di’ak no ami sei halo peskiza no halo komunikasaun di’ak ho governu”, katak.

Nia mós informa, agora daudauk Nova Zelándia sei suporta Revista Lafaek ne’ebé oferese informasaun ba labarik no inan aman sira iha distritu nó mós suporta Konsellu Imprensa atu lori jornalista sira halo treinamentu iha Nova Zelándia.

Entretantu jornalista ne’ebé benefísiu ona tulun hosi Nova Zelándia ne’ebé halo kooperasaun ho konsellu imprensa mak, Zevonia Veira, hosi mídia online Tafara, no Agostu Sarmento, hosi Jornál Timor-Post.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here