DILI, (TATOLI) – Sekretáriu Estadu Komunikasaun Sosiál (SEKOMS), Mericio Juvenal dos Reis Akara, hatete Governu liuhosi reuniaun Konsellu Ministru aban, sei fó sai deklarasaun ofisiál ba públiku kona-ba rezultadu asinatura akordu Timor-Leste hosi sosa asaun hosi kompañia Conocopihilips ho porsentu 30 ba esplorasaun kampu mina greater sunrise.

“Aban, governu pronúnsia deklarasaun ofisiál hodi informa ba públiku kona-ba rezultadu oinsá mak ita hola Conocophilips ho porsentu 30”, Akara ba jornalista sira iha Parlamentu Nasionál, ohin.

Tuir Akara akordu ne’e pasu importante ba Estadu, tanba iha direitu ko’alia no negosia oinsá mak atu dada kadoras mai.

“Maun Boot Xanana Gusmão halo ona relasaun di’ak, liuhosi prosesu ne’e mak ita bele halo diskusaun, negosiasaun  ho Conocophilips, Woodside no Joint Venture sira atu bele dada pipeline (kadoras) mai ita nia rai”, dehan.

Timor-Leste hetan de’it porsentu 30 hosi Conocophilips, Akara esplika lider karismátiku, Xanana Gusmão, nia estratejia dalaruma ema ánalize to’o duvida maibé loron ruma ita sei selebra rezultadu.

Hodi afirma uluk ema duvida atu manan fronteira marítima maibé to’o ikus ita manan. Parte seluk, kuandu iha ona proprietáriu, entaun ita iha direitu atu negosia.

“Ita iha porsentu kiik la’ós kestaun maibé importante mak ita iha direitu atu ko’alia dada kadoras, ida ne’e kestaun ekonómika no negósiu, nune’e ita tenke iha estratejia atu bele iha direitu ko’alia”, katak.

Governante ne’e husu ba sira ne’ebé duvida ba esforsu lider rezisténsia, Xanana Gusmão, nia estratejia presiza lee dokumentu ofisiál, presiza akompaña prosesu oinsá atu dada kadoras mai TL.

Entretantu, hanesan sidadaun tenke orgullu ba esforsu eis-Primeiru Ministru, Xanana Gusmão, ho nia ekipa tomak katak ita hetan ona pasu pozitivu ida no loron ruma ita sei selebra rezultadu hodi benefisia ba povu no Nasaun.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here