DILI, (TATOLI) – Governu liuhusi Ministériu Reforma Lejislativa no Asuntu Parlamentár (MRLAP) ho Ajénsia Ajuda Externa Estadu Unidu Amérika (EUA)-MCC (Millennium Challenge Corporation) organiza semináriu hodi diskute dezafiu xave ba dezenvolvimentu ekonómiku iha kompaktu entre governu ho MCC nomós konstranjimentu ba redusaun pobreza.

Ministru Reforma Lejislativa no Asuntu Parlamentár, Fidelis Leite Magalhães, hatete governu hamutuk ho MCC identifika kontranjimentu ekonómiku sira ne’ebé mak iha, depois dezenvolve akordu ba tinan lima, mak sei konstitui apoiu finanseiru hodi rezolve dezafiu sira ne’ebé depois sei identifika hamutuk.

Ministru Reforma Lejislativa no Asuntu Parlamentár ,Fidelis Leite Magalhães

“Agora kada ministériu tuur hamutuk iha diskusaun ho apoiu ekipa MCC ne’ebé mai husi Washinton DC, tuur hamutuk sira ajuda, guia, halo diskusaun”, katak ministru ba jornalista sira iha salaun Lalini-Lariguto, Sentru Nasionál ba Eleisaun, ohin.

Hosi diskusaun hamutuk ne’e, nia dehan sei lori rezolusaun hodi hetan solusaun.

Governante ne’e esplika programa ne’e atu promove kreximentu ekonómiku ne’ebé inkluzivu, lori oportunidade serbisu, lori moris di’ak ba populasaun.

Programa ne’e importante no la’ós hanoin badak. “Ida ne’e xave.  Tanba aban bainrua, Timor-Leste sei presiza nafatin país amigu, liliu hanesan estadu Unidu Amérika para bele ajuda governu Timor-Leste, halo investimentu públiku ida ne’ebé mak di’ak hodi bele lori dezenvolvimentu ba populasaun”.

Nia hatutan montante jerál ba kompaktu ne’e depende ba identifikasaun problema.  Ita haree programa ne’e bele halo iha tinan lima ka la’e? Depois ida ne’e mak identifika ona problema xave, katak abut ida hanesan konstranjimentu.

Depois identifika mak hafoin halo, dezenvolve akordu naran kompaktu ho ekipa MCC nian; depois ho Timor-Leste dezenvolve, halo intervensaun.

“Ita identifika lai, tanba programa ida ne’e iha elementu ida espesiál katak koko atu introdús objetividade katak bazea duni ba evidénsia”, katak.

Embaixadora Estadu Unidu Amérika (EUA), Kathleen M. Fitzpatrick

Iha fatin hanesan, embaixadora Estadu Unidu Amérika (EUA), Kathleen M. Fitzpatrick, perante profisionál komunikasaun sosiál sira katak programa ne’e implementa husi Timor-Leste ba TL rasik.

“Agradese governu Timor-Leste, sosiedade sívil, setór privadu iha Timor-Leste, sira-nia parseiru ho MCC”, agradese diplomata EUA ne’e.

Antes ne’e, delegasaun MCC husi EUA vizita ona TL hodi diskute programa kompaktu dezenvolvimentu MCC nian atu halakon ki’ak no promove kresimentu ekonómiku liuhusi parseria ho governu.

Konsellu administrasaun MCC hili ona Timor-Leste iha dezembru 2017 hodi hetan programa kompaktu MCC.

Delegasaun MCC governu EUA ne’e inklui vise prezidente operasaun kompaktu Robert Blau, diretora jestaun ba Eropa, Ázia, Pasífiku no Amérika Latina Caroline Nguyen no lider ekipa nian Hana Freymiller.

Durante sira-nia vizita, tuir komunikadu EUA nian delegasaun ne’e hasoru ona ofisiál governu, lider partidu polítiku, sosiedade sívil no setór privadu hodi deskute kona-ba abordajen MCC nian iha luta hasoru ki’ak liuhusi programa kresimentu ekonómiku no dezenvolvimentu integradu ida ba futuru.

“Konsellu administrasaun MCC nian hili Timor-Leste hodi hetan programa kompaktu ne’e tanba Timor-Leste nia kompromisiu ba hametin instituisaun demokrátika sira, manten polítika ne’ebé sólidu iha ekonomia no investimentu ba rekursu umanu”, dehan vise-prezidente MCC Robert Blau.

Kooperasaun ne’e hanesan oportunidade ba TL no Estadu Unidu hodi hametin liutan relasaun no tau hamutuk objetivu sira atu halakon ki’ak liuhusi programa kresimentu ekonómiku.

Embaixadora EUA ba Timor-Leste, Kathleeb M. Fitzpatrick, hateten: “Programa kompaktu ne’e nu’udar oportunidade ekselente ida hodi hametin relasaun entre Estadu Unidu no Timor-Leste iha tinan hirak oin mai”.

Entretantu, Programa kompaktu MCC mak fundu tinan lima nian ba nasaun selesionada sira ne’ebé tuir kritériu rigorozu elijibilidade MCC nian.

Ho dezempeñu Timor-Leste nian ne’ebé forte, tuir kritéria, MCC foti desizaun atu muda Timor-Leste husi programa Smallest Threshold ba Full-fledged Compact.

MCC fó fundu limitadu ida ba nasaun subdezenvolvidu sira ne’ebé haktuir padraun rigorozu sira hanesan governasaun di’ak, kombate korupsaun no respeita direitu demokrátiku sira. Serbisu ho parseiru lokál, MCC serbisu hamutuk ho nasaun sub-dezenvolvidu sira rezolve ona dezafiu krusiál sira hanesan asesu ba eletrisidade, direitu ba rai no estrada.

Durante dezenvolvimentu programa kompaktu ne’e, ne’ebé sei lori tempu entre fulan 24 to’o 36 hodi kumpleta, MCC no governu TL sei dezenvolve programa espesífiku ne’ebé ho nia objetivu atu halakon dezafiu sira ne’ebé impede nasaun ne’e atu dezenvolve. Prosesu dezenvolvimentu programa kompaktu ne’e inklui mós konsultasaun, diskusaun ho sosiedade sívil no setór privadu iha TL.

Seminár ne’e akontese durante loron rua, hahú ohin no ramata aban.

Notísia relevante; http://www.tatoli.tl/2018/07/mcc-sei-oferese-rihun-750-ba-tl-reduz-kiak/

Jornalista: Rafy Belo

Editora: Rita Almeida 

HAKEREK NO HATÁN

Please enter your comment!
Please enter your name here