Diretór Operasaun AIFAESA, Gabriel da Costa.

DILI, (TATOLI) – Diretór Operasaun Autoridade Inspesaun no Fiskalizasaun Atividade Ekonómika no Sanitária (AIFAESA), Gabriel da Costa, hatete AIFAESA sei prosesa supermerkadu Kmanek tanba komete infrasaun rua mak produtu lataria ne’ebé liu prazu (data expire) no falsifikasaun presu.

Nia dehan parte jurídiku AIFAESA haruka karta ba Ministériu Públiku atu bolu na’in ba estabelesimentu ne’e hodi halo konfirmasaun.

“Tanba evidénsia sira ne’e iha hela ami, ema halo keixa mai no buat hotu kompletu. Ohin loraik sira (Kmanek) mai AIFAESA para asina prosesu sira ne’e depois parte departamentu operasaun direta submete ba parte jurídiku hodi haree no bele haruka”, Gabriel hatete iha Matadouru, ohin.

Nu’udar empreza ne’ebé halo atividade komersiál iha país ne’e, maibé ba produtu sira ne’ebé públiku atu konsome balun liu ona prazu no sei fa’an bainhira autoridade halo inspesaun nomós produtu seluk falsifika nia data, AIFAESA ne’ebé serbisu ba saúde públika iha Timor-Leste sei serbisu maka’as hodi deteta sasán sira ne’e, maibé presiza mós rekursu nomós orsamentu atu haree ba kestaun sira ne’e.

“Tanba ita atu hatene katak distribuidór ka empreza boot sira halo negósiu lakohi lakon, hakarak manán, ne’ebé produtu ne’ebé tama ona iha armazein ne’e kuandu tinan rua mak lahotu iha empreza balun bele halo falsifikasaun ne’e barak, maibé to’o agora AIFAESA rasik seidauk deteta buat sira ne’e, maibé iha informasaun”.

Nune’e autoridade ne’e sei esforsu nafatin hodi kontinua haree, tanba atu deteta sasán sira ne’e tenke tun bá baze hodi tama to’o iha laran para rona informasaun.

“Informasaun ne’e ema atu fó sai difisil tebes, maibé tenke uza intelijen para deteta sasán sira ne’e”.

Gabriel dehan informasaun ne’ebé tama iha AIFAESA barak, maibé atu halo asaun presiza iha evidénsia, tanba ne’e sei esforsu maka’as hodi haree.

“Kuandu informasaun sira ne’e tama, AIFAESA presiza halo koordenasaun ho parte seguransa PNSIK (Polísia Nasionál Servisu Investigasaun Kriminál) nomós intelijénsia sira ne’ebé sempre fahe informasaun ba malu, sira mós buka hela fatin sira ne’e para deteta sasán sira ne’ebé deskonfia ema falsifika presu”.

Tanba AIFAESA iha evidénsia ba falsifikasaun presu husi empreza Kmanek maka departamentu operasaun sei hato’o informasaun parte jurídiku no jurídiku submete ba Ministériu Públiku hodi haree no análiza nune’e sei notifika empreza ne’e tanba falsifikasaun ne’e tama ona ba krime.

Foin lalais ne’e AIFAESA halo inspesaun urjente iha armazein Kmanek no loja iha Timor Plaza hodi konfirma loloos sobre produtu chiken nuggets  no lataria ne’ebé liu ona prazu, maibé empreza hafoun fali nia data validade

AIFAESA simu keixa husi  konsumidór sira ne’ebé serbisu iha supermerkadu Kmanek ne’ebé relata kona-ba falsifikasaun data expire sira ne’e, nune’e AIFAESA rasik hola medida hodi atua kedan bá fatin estabelesimentu para haree produtu ne’ebé mak sira falsifika, mas realidade to’o fatin refere produtu ne’ebé presiza haree hodi retira lakonsege deteta no bainhira konfirma ho jerente Kmanek rasik hatete produtu ne’e iha tinan tolu liubá sira halo ona destruisaun no lafa’an ona.

Iha momentu inspesaun ne’e Koordenadór AIFAESA, Abílio Oliveira Sereno, lamenta tebes hahalok empreza ne’e no sei buka evidénsia no bainhira hetan prova sei haruka ba Ministériu Públiku para halo tuir lei ne’ebé vigora.

Jornalista: Maria Auxiliadora

Editora: Rita Almeida

Lee mós :

Aifaesa Husu Konsumidór Haree Validade Produtu

HAKEREK NO HATÁN

Please enter your comment!
Please enter your name here